ന്യൂഡൽഹി: മികച്ച പാർലമെന്റേറിയൻ പുരസ്കാരത്തിനർഹനായ ജോൺ ബ്രിട്ടാസിന് അവാർഡ് പ്രഖ്യാപിച്ചത് സ്വകാര്യ പിആർ ഏജൻസിയെന്ന് റിപ്പോർട്ട്. മുൻ രാഷ്ട്രപതി അബ്ദുൽ കലാമിന്റെ നേതൃത്വത്തിൽ തുടങ്ങിയ സംഘടനയുടെ പുരസ്കാരമാണെന്ന തരത്തിൽ അവാർഡിനെക്കുറിച്ച് വാർത്തകൾ പ്രചരിച്ചിരുന്നു. പാർലമെന്ററി സഹമന്ത്രി അർജുൻ റാം മേഘ്വാൾ അദ്ധ്യക്ഷനായ ജൂറിയാണ് പുരസ്കാര ജേതാവിനെ തിരഞ്ഞെടുത്തതെന്നും ഇതൊരു ഔദ്യോഗിക അവാർഡ് ആണെന്നുമുള്ള ധാരണകൾ ഉയർന്നുവന്നതിന് പിന്നാലെയാണ് നിജസ്ഥിതി പുറത്തുവന്നിരിക്കുന്നത്.
ഏറ്റവും മികച്ച പാർലമെന്റേറിയനായി ജോൺ ബ്രിട്ടാസിനെ തിരഞ്ഞെടുത്തത് യഥാർത്ഥത്തിൽ ചെന്നൈ ആസ്ഥാനമായി പ്രവർത്തിക്കുന്ന സ്വകാര്യ പിആർ ഏജൻസിയാണ്. എല്ലാവർഷവും പാർലമെന്റേറിയൻമാർക്ക് സൻസദ് രത്ന പുരസ്കാരം ഇവർ പ്രഖ്യാപിക്കാറുണ്ട്. ഇത്തവണ 13 പേരെ പ്രസ്തുത പട്ടികയിലേക്ക് തിരഞ്ഞെടുത്തിരുന്നു. അതിലൊരാളായിരുന്നു ജോൺ ബ്രിട്ടാസ്. വിവിധ ദേശീയ പാർട്ടികളുടെ പ്രതിനിധികളാണ് മറ്റുള്ളവർ. ജാർഖണ്ഡ്, പശ്ചിമ ബംഗാൾ, മഹാരാഷ്ട്ര, മദ്ധ്യപ്രദേശ്, ഉത്തർപ്രദേശ്, ബിഹാർ, ഛത്തീസ്ഗഡ് തുടങ്ങിയ സംസ്ഥാനങ്ങളിൽ നിന്നും ബിജെപി, കോൺഗ്രസ്, എൻസിപി, ആർജെഡി, എസ്പി എന്നീ പാർട്ടികളിൽ നിന്നുള്ളവർ അവാർഡിനായി തിരഞ്ഞെടുക്കപ്പെട്ടു.
പുരസ്കാരം നൽകുന്ന ഏജൻസിയുമായി ബന്ധപ്പെട്ട് അബ്ദുൾ കലാമിന്റെ പേര് കൂടി ചേർത്തുവായിച്ചായിരുന്നു പലരും വാർത്ത പങ്കുവച്ചിരുന്നത്. എന്നാൽ പിആർ ഏജൻസിയുടെ പ്രഥമ അവാർഡ് ദാന ചടങ്ങ് 2010ൽ നടക്കുമ്പോൾ അതിന്റെ ഉദ്ഘാടനം ഓൺലൈനായി നിർവഹിച്ചു എന്നുള്ളതാണ് പുരസ്കാരവുമായി അബ്ദുൾ കലാമിനുള്ള ഏക ബന്ധം.
