കുഞ്ഞുങ്ങൾക്ക് പരിചരണം ഏറെ പ്രധാനമാണ്. പ്രത്യേകിച്ചും നവജാത ശിശുക്കൾക്ക്. ജനിച്ചാൽ ആദ്യത്തെ ആറു മാസം വരെ കുഞ്ഞുങ്ങൾക്ക് മുലപ്പാൽ മാത്രം നൽകണമെന്നാണ് വിദഗ്ധരുടെ അഭിപ്രായം. കുഞ്ഞിന്റെ വളർച്ചയ്ക്ക് ആവശ്യമായ എല്ലാ പോഷകങ്ങളും മുലപ്പാലിൽ അടങ്ങിയിട്ടുണ്ട്. ആവശ്യത്തിന് മുലപ്പാൽ ലഭിയ്ക്കുന്നുവെങ്കിൽ മറ്റ് ഒരു ഭക്ഷണത്തിന്റെയും ആവശ്യം ആറു മാസം വരെ കുഞ്ഞിനില്ല.
ജനിച്ച് ആദ്യത്തെ രണ്ടു മാസം വരെ മൂന്നു മണിക്കൂർ ഇടവേളയിൽ കുഞ്ഞിനെ മുലയൂട്ടുകയെന്നത് പ്രധാനമാണ്. വയർ നിറയുവോളം പാൽ കുടിയ്ക്കാൻ കുഞ്ഞിന് 20 മിനിറ്റു വരെ വേണ്ടി വരും. അധികം കുടിയ്ക്കാനും സാധിയ്ക്കില്ല. ചില കുഞ്ഞുങ്ങൾ അധികം പാൽ കുടിയ്ക്കും. ആദ്യത്തെ മൂന്നു മാസങ്ങൾക്ക് ശേഷം കുഞ്ഞിന് മൂന്നു നാലു മണിക്കൂർ ഇടവേളയിൽ പാൽ നൽകിയാൽ മതി. നാലു മാസങ്ങൾക്ക് ശേഷം കുടിയ്ക്കുന്ന പാലിന്റെ അളവ് കൂടും. ആറു മാസം കഴിഞ്ഞാൽ അളവിൽ കൂടുതൽ പാൽ കുടിയ്ക്കാൻ തുടങ്ങും. ഇത് കാരണം മുൻപത്തെക്കാൾ നീണ്ട ഇടവേളയിൽ കുഞ്ഞുങ്ങൾക്ക് പാൽ നൽകിയാൽ മതി. മാത്രമല്ല, വിശപ്പുണ്ടെങ്കിൽ അത് പ്രകടിപ്പിയ്ക്കാനും കുഞ്ഞിനറിയാം. പാൽ മതിയായെങ്കിൽ ഇത് കുഞ്ഞിന്റെ പെരുമാറ്റ ലക്ഷണങ്ങളിൽ നിന്നറിയാൻ സാധിയ്ക്കും. പാൽ കുടിയ്ക്കുന്നത് മതിയാക്കി സ്തനങ്ങളിൽ നിന്നും ശ്രദ്ധ തിരിയ്ക്കുക, പാൽ കുടിയ്ക്കുന്നതിനിടെ ഉറങ്ങുക, തല കുലുക്കുക, വായ അടച്ചു പിടിയ്ക്കുക എന്നതെല്ലാം കുഞ്ഞിന് പാൽ മതിയായതിന്റെ ലക്ഷണങ്ങളിൽ പെടും. വീണ്ടും കുടിപ്പിയ്ക്കാൻ നോക്കിയാലും കുഞ്ഞ് താൽപര്യം കാണിച്ചെന്നു വരില്ല. വിശപ്പു മാറിയാൽ കുഞ്ഞ് ഉറങ്ങുകയോ സന്തോഷത്തോടെ കളിയ്ക്കുകയോ ചെയ്യും. കരച്ചിലുണ്ടാകില്ല.
മുലയൂട്ടൽ കൊണ്ടുള്ള ഗുണങ്ങൾ അറിയാം
ഒട്ടുമിക്ക കുഞ്ഞുങ്ങൾക്കും ഏറ്റവും മികച്ച പോഷകാഹാരമാണ് മുലപ്പാൽ. നിങ്ങളുടെ കുഞ്ഞിന് ആവശ്യമായ ഭക്ഷണവും പാനീയവും അടങ്ങുന്നതാണ് മുലപ്പാൽ. കുഞ്ഞ് വളരുമ്പോൾ, അമ്മയുടെ മുലപ്പാൽ കുഞ്ഞിന്റെ പോഷക ആവശ്യങ്ങൾ നിറവേറ്റുന്നതിനായി മാറും. ചില ഹ്രസ്വ-ദീർഘകാല രോഗങ്ങളിൽ നിന്നും കുഞ്ഞുങ്ങളെ സംരക്ഷിക്കാൻ മുലയൂട്ടൽ സഹായിക്കും. വളർച്ചയുടെ ഓരോ ഘട്ടത്തിനും അനുസരിച്ച് കുഞ്ഞിന്റെ ആവശ്യങ്ങളെ നിറവേറ്റാൻ മുലപ്പാലിന് സാധിക്കും. മുലപ്പാൽ കുടിക്കാത്ത കുഞ്ഞുങ്ങളെ അപേക്ഷിച്ച് മുലപ്പാൽ കുടിക്കുന്ന കുട്ടികൾക്ക് അസുഖം കുറവാണ്.
മൂത്രാശയത്തിലോ വൃക്കയിലോ ഉള്ള അണുബാധ, വയറ്റിലെയും കുടലിന്റെയും അസുഖം, നെഞ്ചിലെ അണുബാധ. ചെവി അണുബാധ, അലർജികൾ (എക്സിമയും ആസ്ത്മയും ഉൾപ്പെടെ), കുട്ടിക്കാലത്തെ ചില അർബുദങ്ങൾ, പൊണ്ണത്തടി, പ്രമേഹം, പിന്നീടുള്ള ജീവിതത്തിൽ ഹൃദ്രോഗം, ടൈപ്പ് 1 പ്രമേഹം, പെട്ടെന്നുള്ള ശിശുമരണ സിൻഡ്രോം എന്നിവ മുലപ്പാൽ കുടിക്കുന്ന കുട്ടികൾക്കുണ്ടാകില്ല.
മുലയൂട്ടൽ അമ്മമാർക്കും ആരോഗ്യപരമായ ഗുണങ്ങൾ നൽകുന്നു. സ്തന, അണ്ഡാശയ അർബുദം, ടൈപ്പ് 2 പ്രമേഹം, ഉയർന്ന രക്തസമ്മർദ്ദം എന്നിവയ്ക്കുള്ള സാധ്യത അമ്മമാരിൽ കുറയ്ക്കും.! ചില ക്യാൻസറുകൾ, ടൈപ്പ് 2 പ്രമേഹം, ഉയർന്ന രക്തസമ്മർദ്ദം എന്നിവ മുലയൂട്ടുന്ന സ്ത്രീകളിൽ കുറവായിരിക്കും.
