തിരുവനന്തപുരം: മുഖ്യമന്ത്രിക്കെതിരെ നിയമസഭയിൽ തുറന്നടിച്ച മാത്യു കുഴൽനാടനെ വിമർശിച്ച് ഇടത് എംഎൽഎ വി. ജോയ്. തിരക്കഥ ഉണ്ടാക്കി ചില വക്കീലന്മാർ കോടതിയിൽ കാണിക്കുന്ന ശൈലിയാണ് മാത്യു കുഴൽനാടന്റേത്. മാത്യു കുഴൽനാടൻ ബിരുദമെടുത്തതു പോലെയല്ല മുഖ്യമന്ത്രിക്ക് ബിരുദം ലഭിച്ചതെന്നും പിണറായി വിജയന് ബിരുദം നൽകിയത് കേരളത്തിലെ ജനങ്ങളാണെന്നും വി ജോയ് നിയമസഭയിൽ പറഞ്ഞു.
‘സാധാരണ നിലയിൽ വക്കീലന്മാർ ചെയ്യുന്ന ഒരു കാര്യമുണ്ട്. ഞാൻ കുറച്ചു നാൾ പ്രാക്ടീസിന് ചെയ്തതാണ്. വാദം തുടങ്ങുന്നതിന് മുമ്പ് ജൂനിയേഴ്സിനെ എല്ലാം വിളിച്ചിരുത്തി ഒന്ന് വായിക്കും. ശേഷം, ഒരു കഥയുണ്ടാക്കും. ആ കഥ കോടതി മുമ്പാകെ അവതരിപ്പിക്കും. ആ കഥയ്ക്ക് തിരക്കഥയുമുണ്ടാക്കും. മാത്യു കുഴൽനാടൻ അതിന്റെ ഒരു ആശാനാണ്. മാത്യു കുഴല്നാടന് കുറേനാളുകളായി മുഖ്യമന്ത്രിയെ ലക്ഷ്യമിടുന്നു. മാദ്ധ്യമങ്ങളില് ഒരു ഇമേജ് ലഭിക്കും എന്നുള്ളതുകൊണ്ടാണ് ഇങ്ങനെ ചെയ്യുന്നത്’.
‘മാത്യു കുഴൽനാടൻ ശ്രദ്ധിക്കേണ്ട ഒരു കാര്യമുണ്ട്. കുഴൽനാടന് ബിരുദമുണ്ട്. കേരളത്തിന്റെ മുഖ്യമന്ത്രിക്കും ബിരുദമുണ്ട്. അങ്ങ് ബിരുദമെടുത്തതു പോലെ അല്ല കേരളത്തിന്റെ മുഖ്യമന്ത്രി ബിരുദമെടുത്തത്. അത് ജനങ്ങള് കൊടുത്ത പ്രത്യേക ബിരുദമാണ്. തിരക്കഥ മെനഞ്ഞാല് അത് ഇല്ലാതാകില്ല’ എന്നാണ് വി. ജോയ് നിയമസഭയിൽ പറഞ്ഞത്.
