ബാഹുബലി എന്ന ബ്രഹ്മാണ്ഡ ചിത്രത്തിന് ശേഷം രാജമൗലിയുടെ സംവിധാനത്തിൽ അരങ്ങു തകർത്ത ചിത്രമാണ് ആർആർആർ. പ്രഖ്യാപന സമയം മുതൽ പ്രദർശനവേളയിലുൾപ്പെടെ ചിത്രത്തിന് ലഭിച്ച പ്രേക്ഷക സ്വീകാര്യത തന്നെയാണ് ആർആർആറിന്റെ പിന്നിലെ വിജയ രഹസ്യം. അവാർഡുകൾ വാരിക്കൂട്ടിയുള്ള ചിത്രത്തിന്റെ യാത്ര ഇപ്പോൾ ഓസ്‌കർ വേദിയിലെത്തി നിൽക്കുകയാണ്. പുരസ്‌കാര നോമിനേഷനിൽ മികച്ച ഗാനത്തിനുള്ള അവസാന പട്ടികയിലും ചിത്രത്തിലെ നാട്ടു നാട്ടു ഗാനം ഇടം പിടിച്ചിട്ടുണ്ട്.
നാട്ടു നാട്ടു ഗാനം ഈ വർഷത്തെ പുരസ്‌കാര ചടങ്ങിൽ അവതരിപ്പിക്കുമെന്ന് ഒസ്‌കാറിന്റെ സംഘാടകാംഗങ്ങൾ കഴിഞ്ഞ ദിവസം ട്വിറ്ററിലൂടെ അറിയിച്ചിരുന്നു. 95-ാമത് ഓസ്‌കാർ ചടങ്ങാണ് മാർച്ച് 12-ന് ലോസ് ഏഞ്ചൽസിലെ ഡോൾബി തിയേറ്ററിൽ അരങ്ങേറുക. നാട്ടു നാട്ടു ഗാനം അവതരിപ്പിക്കുന്നതിനായി ഗായകരായ രാഹുൽ സിപ്ലിഗഞ്ചും കാലഭൈരവയും വേദിയിലെത്തും.
ഒസ്‌കാർ പുരസ്‌കാരത്തോടനുബന്ധിച്ച് റീ-റിലീസിന് ഒരുങ്ങുകയാണ് ആർആർആർ. അമേരിക്കയിലാണ് ചിത്രം വീണ്ടും പ്രദർശനത്തിനൊരുങ്ങുന്നത്. ആദ്യഘട്ടമെന്ന നിലയിൽ ഇരുന്നൂറോളം തിയറ്ററുകളിലാണ് ചിത്രം പ്രദർശനത്തിനെത്തുക. വേരിയൻസ് ഫിലിംസാണ് ചിത്രം യുഎസിൽ വിതരണം ചെയ്തത്. ചിത്രത്തിന്റെ റീ-റിലീസിനോടനുബന്ധിച്ച് അണിയറ പ്രവർത്തകർ പുതിയ ട്രെയിലറുകളും പുറത്തിറക്കിയിരുന്നു.
2022 മാർച്ച് 22-നാണ് ചിത്രം പ്രദർശനത്തിനെത്തിയത്. പിന്നീട് ചിത്രത്തിന്റെ പ്രേക്ഷക സ്വീകര്യതയെ വിലയിരുത്തി സീ5 പ്ലാറ്റ്‌ഫോമിലൂടെ ഒടിടിയിലുമെത്തി. 650 കോടി മുതൽ മുടക്കിൽ ആരാധകർക്ക് മുന്നിലെത്തിയ ചിത്രം ഒരുമാസം കൊണ്ട് ആയിരം കോടി കളക്ഷനിലെത്തിയിരുന്നു. അടുത്തിടെ ജപ്പാനിലും പ്രദർശനത്തിനെത്തിയ ചിത്രത്തിന് മികച്ച പ്രതികരണമായിരുന്നു ലഭിച്ചത്.
