ബോളിവുഡ് നടി ജാക്വിലിൻ ഫെർണാണ്ടസിന് തുറന്ന കത്തുമായി കോൺമാൻ സുകേഷ് ചന്ദ്രശേഖർ. നിനക്ക് വേണ്ടി ഏതറ്റം വരെയും പോകുമെന്നും ഹോളി ആശംസകളെന്നും ജാക്വിലിന് നൽകിയ കത്തിൽ സുകേഷ് പറയുന്നു. സുകേഷിന്റെ തുറന്ന കത്ത് മാദ്ധ്യമങ്ങളെ ഉൾപ്പെടെ അഡ്രസ് ചെയ്താണ് പ്രസിദ്ധീകരിച്ചിരിക്കുന്നത് എന്നതും ശ്രദ്ധേയമാണ്.
നിലവിൽ തിഹാർ ജയിലിൽ കഴിയുന്ന സുകേഷ് ചന്ദ്രശേഖർ ഹോളിയോട് അനുബന്ധിച്ചാണ് തന്റെ പ്രസ്താവന അറിയിച്ചിരിക്കുന്നത്. തനിക്ക് പറയാനുള്ള കാര്യങ്ങൾ കൂടി പുറംലോകത്തെ അറിയിച്ചതിൽ മാദ്ധ്യമങ്ങൾക്ക് നന്ദിയുണ്ടെന്നും അദ്ദേഹം വ്യക്തമാക്കി. കുടുംബാംഗങ്ങൾ, സുഹൃത്തുക്കൾ, പിന്തുണച്ചവർ, വെറുക്കുന്നവർ, നിയമപരിരക്ഷ നൽകിയവർ എന്നിങ്ങനെ എല്ലാവർക്കും ഹോളി ആശംസകൾ നേരുന്നതായി സുകേഷ് പറഞ്ഞു.
ജാക്വിലിനെ ‘ഫന്റാസ്റ്റിക് വുമൺ’ എന്നാണ് സുകേഷ് വിശേഷിപ്പിച്ചത്. അവളുടെ ജീവിതത്തിൽ ഇല്ലതായ നിറങ്ങൾ തിരികെ കൊണ്ടുവരുമെന്ന് സുകേഷ് ഉറപ്പുനൽകി. ”എപ്പോഴും ചിരിച്ചുകൊണ്ടിരിക്കുക. എനിക്ക് എത്രത്തോളം വലുതാണ് നീയെന്ന് നിനക്ക് നല്ലപോലെ അറിയാം. എന്റെ രാജകുമാരിയെ ഞാൻ ഒരുപാട് സ്നേഹിക്കുന്നു. ഒരുപാട് മിസ്സെയ്യുന്നു..” എന്ന് സുകേഷ് കുറിച്ചു.
200 കോടി രൂപയുടെ തട്ടിപ്പ് കേസുമായി ബന്ധപ്പെട്ടാണ് സുകേഷ് ചന്ദ്രശേഖർ നിലവിൽ ജയിലിൽ കഴിയുന്നത്. തട്ടിപ്പിൽ ജാക്വിലിൻ ഫെർണാണ്ടസിന് യാതൊരു പങ്കുമില്ലെന്നാണ് പട്യാല കോടതിയിൽ വിചാരണ നടക്കുന്നതിനിടെ സുകേഷ് വ്യക്തമാക്കിയത്.
Comments