ന്യൂഡല്‍ഹി: ജിഎസ്ടി നിയമത്തില്‍ നിര്‍ണായക മാറ്റങ്ങള്‍ക്ക് ശുപാര്‍ശ ചെയ്ത് ജിഎസ്ടി കൗണ്‍സില്‍. നികുതി ഉദ്യോഗസ്ഥര്‍ക്കുള്ള അറസ്റ്റ് അധികാരം ഒഴിവാക്കാനും ക്രിമിനല്‍ പ്രോസിക്യൂഷന് ആവശ്യമായ നികുതി തുകയുടെ പരിധി ഒരു കോടിയില്‍ നിന്ന് അഞ്ച് കോടിയായി ഉയര്‍ത്താനുമാണ് കൗണ്‍സിലിന്റെ തീരുമാനം. ശിക്ഷ സംബന്ധിച്ച കാര്യങ്ങളില്‍ പിഴയോ തടവോ രണ്ടും വേണമോ എന്നത് ഓരോ കേസിന്റെയും സാഹചര്യം പരിഗണിച്ച് കോടതിയുടെ തീരുമാനത്തിന് വിടാനും ശുപാര്‍ശ ചെയ്തു.
വ്യാഴാഴ്ച ന്യൂഡല്‍ഹിയില്‍ ചേര്‍ന്ന ജിഎസ്ടി കൗണ്‍സില്‍ യോഗത്തിന് ശേഷം ധനമന്ത്രി നിര്‍മല സീതാരാമനാണ് തീരുമാനങ്ങള്‍ വിശദീകരിച്ചത്. ജിഎസ്ടി നിരക്കുകളില്‍ നിലവില്‍ മാറ്റമൊന്നും വരുത്തിയിട്ടില്ലെന്നും നിലവിലെ നിരക്ക് ഘടന തുടരുമെന്നും മന്ത്രി വ്യക്തമാക്കി. വൈകി റിട്ടേണ്‍ സമര്‍പ്പിക്കല്‍, പിഴവുകള്‍ വരുത്തല്‍, നികുതി അടയ്‌ക്കുന്നതില്‍ കാലതാമസം തുടങ്ങിയ കാര്യങ്ങളില്‍ നേരിട്ട് ക്രിമിനല്‍ നടപടി സ്വീകരിക്കുന്നതിന് പകരം നികുതി വീണ്ടെടുക്കല്‍, പലിശ, സാഹചര്യത്തിന് അനുസരിച്ചുള്ള പിഴ തുടങ്ങിയ നടപടികളായിരിക്കും പ്രധാനമായും ഉണ്ടാകുക.
ചെറിയ തുകകളുമായി ബന്ധപ്പെട്ട ജിഎസ്ടി തര്‍ക്കങ്ങള്‍ ഒഴിവാക്കുന്നതിനും കൗണ്‍സില്‍ ശുപാര്‍ശ നല്‍കി. 10,000-ഓ അതില്‍ താഴെയോ വരുന്ന തുകയ്‌ക്ക് നോട്ടീസ് നല്‍കേണ്ടതില്ല. നിലവില്‍ പരിഗണനയിലുള്ള ഇത്തരം പരിധിക്ക് താഴെയുള്ള നോട്ടീസുകള്‍ പിന്‍വലിക്കാനും ശുപാര്‍ശയുണ്ട്. നോട്ടീസ് നല്‍കുന്നതിലും തുടര്‍നടപടികളിലും രാജ്യത്തുടനീളം ഏകീകൃത മാനദണ്ഡങ്ങള്‍ കൊണ്ടുവരാനും കൗണ്‍സില്‍ ശുപാര്‍ശ ചെയ്തിട്ടുണ്ട്.
Don’t miss the latest breaking news and updates! Subscribe to Janam TV’s WhatsApp channel now…
https://whatsapp.com/channel/0029Va4LMqWE50UdrVhraq0y
ജിഎസ്ടി നിയമത്തിലെ ചില കുറ്റകൃത്യങ്ങളെ ക്രിമിനല്‍ നടപടികളുടെ പരിധിയില്‍നിന്ന് മാറ്റുന്നതിനുള്ള നടപടികളുടെ ഭാഗമാണ് പുതിയ തീരുമാനം. നികുതി സംവിധാനത്തില്‍ പാലനച്ചെലവും അനാവശ്യ തര്‍ക്കങ്ങളും കുറയ്‌ക്കുകയാണ് ലക്ഷ്യം. ജിഎസ്ടി കൗണ്‍സിലിന്റെ ശുപാര്‍ശകള്‍ക്ക് നിയമപരമായ പ്രാബല്യം ലഭിക്കുന്നതിന് ആവശ്യമായ നിയമഭേദഗതികളും വിജ്ഞാപനങ്ങളും പിന്നീട് വരേണ്ടതുണ്ട്. ജിഎസ്ടി കൗണ്‍സിലിന്റെ മുന്‍കാല ശുപാര്‍ശകള്‍ക്കും ബന്ധപ്പെട്ട നിയമഭേദഗതികള്‍/വിജ്ഞാപനങ്ങളിലൂടെയാണ് പ്രാബല്യം ലഭിച്ചിരുന്നത്.
