പ്രശസ്ത ബോളിവുഡ് നടനും സംവിധായകനുമായ സതീഷ് കൗശിക് അന്തരിച്ചു. 66- വയസായിരുന്നു. ഹൃദയാഘാതത്തെ തുടർന്നായിരുന്നു അന്ത്യം. മരണവാർത്ത അടുത്ത സുഹൃത്തും നടനുമായ അനുപം ഖേറാണ് ട്വിറ്ററിലൂടെ അറിയിച്ചത്.
മരണം ലോകത്തിന്റെ പരമമായ സത്യമാണ്. 45 വർഷത്തെ സൗഹൃദത്തിന് പെട്ടെന്ന് അവസാനമായി. സതീഷ് ഇല്ലാത്ത ജീവിതം ഒരിക്കലും പഴയത് പോലെ ആകില്ലെന്നുമാണ് അനുപം ഖേർ ട്വിറ്ററിൽ കുറിച്ചത്.
അനുപം ഖേറിന്റെ ട്വീറ്റിന് പിന്നാലെ കങ്കണ ഉള്പ്പടെയുള്ള മുൻനിര താരങ്ങളും അനുശോചനം രേഖപ്പെടുത്തിയിട്ടുണ്ട്. നടന്, തിരക്കഥാകൃത്ത്, കൊമേഡിയന്, സംവിധായകന്, നിര്മാതാവ് എന്നീ മേഖലകളില് പ്രാഗത്ഭ്യം തെളിയിച്ചിട്ടുള്ള സതീഷ് കൗശിക് 1956 ഏപ്രില് 13-ന് ഹരിയാനയിലാണ് ജനിച്ചത്.
മിസ്റ്റർ ഇന്ത്യ, ദീവാന മസ്താന, ബ്രിക്ക് ലെയ്ൻ, സാജൻ ചലെ സസുരാൽ തുടങ്ങി നിരവധി സിനിമകളിൽ അദ്ദേഹം പ്രവർത്തിച്ചിട്ടുണ്ട്. രൂപ് കി റാണി ചോറോൻ കാ രാജ, പ്രേം, ഹം ആപ്കെ ദിൽ മേ രേഹ്തേ ഹേ, തേരേ നാം തുടങ്ങിയ ചിത്രങ്ങളാണ് അദ്ദേഹം സംവിധാനം ചെയ്തത്.
Comments