അഹമ്മദാബാദ്: ഭാരതത്തിലെയും ഓസ്ട്രേലിയയിലെയും ബിരുദങ്ങൾ പരസ്പരം അംഗീകരിക്കുമെന്ന് പ്രഖ്യാപിച്ച് ഓസ്ട്രേലിയൻ പ്രധാനമന്ത്രി ആന്റണി അൽബനീസ്. ഗാന്ധിനഗറിലെ ഗിഫ്റ്റ് സിറ്റിയിൽ ഓസ്ട്രേലിയൻ സർവകലാശാല ഡീകിനിന്റെ ക്യാംപസ് പ്രഖ്യാപന സമയത്താണ് ഓസ്ട്രേലിയൻ പ്രധാനമന്ത്രി ഇക്കാര്യം അറിയിച്ചത്.
ഈ പ്രഖ്യാപനത്തിലൂടെ ഓസ്ട്രേലിയയിൽ ഇന്ത്യൻ വിദ്യാർത്ഥികൾ നേടുന്ന ബിരുദങ്ങൾക്ക് ഇന്ത്യയിൽ അംഗീകാരം ലഭിക്കും. ഇന്ത്യയിലെ വിദ്യാഭ്യാസ യോഗ്യത ഓസ്ട്രേലിയയിലും അംഗീകരിക്കപ്പെടും. മാത്രമല്ല ഓസ്ട്രേലിയയിൽ 4 വർഷം വരെയുള്ള പഠനത്തിനെത്തുന്ന ഇന്ത്യൻ വിദ്യാർഥികൾക്കായി മൈത്രി സ്കോളർഷിപ്പുകളും ആൽബനീസ് ചടങ്ങിൽ പ്രഖ്യാപിച്ചു.
കഴിഞ്ഞദിവസമാണ് നാലുദിവസത്തെ ഇന്ത്യാ സന്ദർശനത്തിനായി ഓസ്ട്രേലിയൻ പ്രധാനമന്ത്രി ആന്റണി അൽബനീസ് അഹമ്മദാബാദിലെത്തിയത്. അൽബനീസിനെ മുഖ്യമന്ത്രി ഭൂപേന്ദ്ര പട്ടേലിന്റെ നേതൃത്വത്തിലാണ് സ്വീകരിച്ചത്. ഗാന്ധിജിയുടെ സാബർമതി ആശ്രമം സന്ദർശിച്ച അദ്ദേഹം ഗാന്ധിനഗറിലെത്തി. തുടർന്ന് രാജ്ഭവനിൽ ഗവർണർ ആചാര്യ ദേവവ്രത് ഒരുക്കിയ ഹോളി സാംസാകാരിക വിരുന്നിലും പങ്കെടുത്തിരുന്നു.
Comments