മുംബെ: ചലച്ചിത്ര രംഗത്ത് അസാധാരണ വ്യക്തിമുദ്ര പതിപ്പിച്ച സതീഷ് കൗശികിന്റെ മരണത്തിൽ അനുശോചനം രേഖപ്പെടുത്തി മഹാരാഷ്ട്ര ഗവർണർ രമേഷ് ബയസ്. നടനും സംവിധായകനുമായ കൗശിക്ക് ഹൃദയാഘാതം മൂലമാണ് മരിച്ചത്. ഗവർണർ ട്വിറ്റിലൂടെയാണ് അനുശോചനം രേഖപ്പെടുത്തിയത്.
നടൻ, സംവിധായകൻ, നിർമ്മാതാവ് തുടങ്ങി വിവിധ മേഖലകളിൽ അദ്ദേഹം തന്റെ മുദ്ര പതിപ്പിച്ചിട്ടുണ്ട്. നിരവധി കഥാപാത്രങ്ങളെ അനശ്വരമാക്കി കാഴ്ച്ചക്കാരിൽ മനം കവരുന്ന അഭിനയം കാഴ്ച്ചവെച്ചു. ഹാസ്യ രംഗത്തും മികച്ച പ്രകടനം സതീഷ് കാഴ്ചവെച്ചെന്നും അദ്ദേഹം പറഞ്ഞു.
അനുപം ഖേറിന്റെ ട്വീറ്റിന് പിന്നാലെ കങ്കണ ഉൾപ്പടെയുള്ള മുൻനിര താരങ്ങളും അനുശോചനം രേഖപ്പെടുത്തിയിട്ടുണ്ട്. നടൻ, തിരക്കഥാകൃത്ത്, കൊമേഡിയൻ, സംവിധായകൻ, നിർമാതാവ് എന്നീ മേഖലകളിൽ പ്രാഗത്ഭ്യം തെളിയിച്ചിട്ടുള്ള സതീഷ് കൗശിക് 1956 ഏപ്രിൽ 13-ന് ഹരിയാനയിലാണ് ജനിച്ചത്.
മിസ്റ്റർ ഇന്ത്യ, ദീവാന മസ്താന, ബ്രിക്ക് ലെയ്ൻ, സാജൻ ചലെ സസുരാൽ തുടങ്ങി നിരവധി സിനിമകളിൽ അദ്ദേഹം പ്രവർത്തിച്ചിട്ടുണ്ട്. രൂപ് കി റാണി ചോറോൻ കാ രാജ, പ്രേം, ഹം ആപ്കെ ദിൽ മേ രേഹ്തേ ഹേ, തേരേ നാം തുടങ്ങിയ ചിത്രങ്ങളാണ് അദ്ദേഹം സംവിധാനം ചെയ്തത്.
