തിരുവനന്തപുരം: ഈ മാസം 17-ന് തിരുവന്തപുരത്ത് എത്തുന്ന രാഷ്ട്രപതി ദ്രൗപദി മുർമുവിന്റെ താമസം സ്വകാര്യ ഹോട്ടലിൽ. രാജ്ഭവനിൽ അറ്റകുറ്റപ്പണി നടക്കുന്നതിനാലാണ് രാഷ്ട്രപതിയുടെ താമസം ഹയാത്ത് റീജൻസി ഹോട്ടലിൽ ഒരുക്കിയിരിക്കുന്നത്. മന്ത്രി മന്ദിരങ്ങളും സർക്കാർ മേടകളും പുതുക്കാനും മോടി പിടിപ്പിക്കാനും കോടികൾ ചിലവാക്കുമ്പോഴാണ് രാജ്ഭവനിലെ അറ്റകുറ്റപ്പണികൾക്ക് താമസം നേരിടുന്നത്.
രാഷ്ട്രപതിയുടെ കേരള സന്ദർശനത്തിൽ രാജ്ഭവന് സമീപമുള്ള ഗസ്റ്റ് ഹൗസിലെ പ്രസിഡൻഷ്യൽ സ്വീറ്റിലാണ് താമസസൗകര്യം ഒരുക്കാറുള്ളത്. എന്നാൽ ഗവർണർ താമസിക്കുന്ന രാജ്ഭവനിലെ അപ്പാർട്മെന്റിൽ രൂക്ഷമായ മരപ്പട്ടി ശല്യത്തെ തുടർന്ന് നിലവിൽ പ്രസിഡൻഷ്യൽ സ്വീറ്റിലാണ് ഗവർണറുടെ താമസം. അതിനോട് ചേർന്ന് തന്നെയാണ് ഗവർണറുടെ ഓഫീസും പ്രവർത്തിക്കുന്നത്. ഇതേ തുടർന്നാണ് രാഷ്ട്രപതിയ്ക്ക് സ്വകാര്യ ഹോട്ടലിൽ താമസം ഒരുക്കേണ്ടിവന്നത്. രാഷ്ട്രപതിയായശേഷം മുർമുവിന്റെ ആദ്യ സന്ദർശനമാണിത്. രണ്ട് ദിവസത്തെ സന്ദർശനത്തിനായാണ് രാഷ്ട്രപതി കേരളത്തിലെത്തുന്നത്.
Comments