പറയുമ്പോൾ കാര്യം സിമ്പിളാണെങ്കിലും സത്യത്തിൽ അത്ര എളുപ്പമല്ല, ഈ ഭക്ഷണം കഴിപ്പെന്ന പരിപാടി. ചിലപ്പോൾ കാര്യങ്ങൾ കൈവിട്ടെന്നിരിക്കാം, അതായത് ഭക്ഷണം അന്നനാളത്തിൽ കുടുങ്ങി പോകാം. വളരെ സങ്കീർണമായ അവസ്ഥയാണിത്. ഭക്ഷണം കുടുങ്ങിയാൽ പിന്നെ സംസാരിക്കുകയെന്നത് വളരെ ബുദ്ധിമുട്ടേറിയ കാര്യമാണ്.
എന്തും കുടുങ്ങാമെന്നുള്ളതിനാൽ ഭക്ഷണം കഴിക്കുമ്പോൾ ഏറെ ശ്രദ്ധ പുലർത്തേണ്ടതാണ്. പ്രായഭേദമന്യേയും ഭക്ഷണം കുടുങ്ങും.
കൊച്ചുകുട്ടികൾക്കും മുതിർന്നവർക്കും ഈ പ്രശ്നം മൂലമുള്ള ശ്വാസംമുട്ടൽ ഉണ്ടാകാറുണ്ട്. ഗുരുതരമായ സാഹചര്യങ്ങളിൽ ശ്വാസതടസ്സം നേരിട്ട് മരണം വരെ സംഭവിക്കാം. ഭക്ഷണമോ മറ്റെന്തെങ്കിലും വസ്തുവോ നിങ്ങളുടെ തൊണ്ടയിലോ ശ്വാസനാളിയിലോ കുടുങ്ങുമ്പോൾ ശ്വാസകോശത്തിലേക്കുള്ള വായുവിന്റെ ഒഴുക്ക് തടയുകയാണ് ചെയ്യുന്നത്. വായുവിന്റെ അഭാവം മൂലമാണ് മരണം വരം സംഭവിക്കുന്നത്.
സംസാരിക്കാനുള്ള കഴിവില്ലായ്മ, ശ്വസിക്കുന്നതിൽ ബുദ്ധിമുട്ട് അല്ലെങ്കിൽ ശബ്ദത്തോടെയുള്ള ശ്വസനം, ചുമ എന്നിവ അനുഭവപ്പെടാം. ചർമ്മം,ചുണ്ടുകൾ, നഖങ്ങൾ എന്നിവ നീല നിറത്തിൽ അല്ലെങ്കിൽ മങ്ങിയതായി മാരാനുമുള്ള സാധ്യതയുണ്ട്. ജീവൻ തന്നെ അപകടപ്പെടുത്തുന്ന ഒരു അടിയന്തരാവസ്ഥയാണ് ഇത്. ഈ ലക്ഷണങ്ങൾ പ്രകടമാകുന്നയുടൻ തന്നെ വൈദ്യസഹായം നേടേണ്ടതാണ്.
ഭക്ഷണം കുടുങ്ങിയാൽ പ്രയോഗിക്കാൻ ചില തന്ത്രങ്ങളുണ്ട്. കുട്ടികളിലായാലും മുതിർന്നവരിലായാലും ഭക്ഷണം കുടുങ്ങിയാൽ, കുടിങ്ങിയ ആളോട് ചുമയ്ക്കാൻ ആവശ്യപ്പെടാം. ചുമയുടെ പ്രഷറിൽ കുടുങ്ങിയ ഭക്ഷണം പുറന്തള്ളപ്പെടും. കുനിച്ച് നിർത്തി പുറംഭാഗത്ത് ശക്തമായി തട്ടിയലും കുടുങ്ങിയ ഭക്ഷണം പുറന്തള്ളും . ചെറിയ കുട്ടികളാണെങ്കിൽ കമിഴ്ത്തി പിടിച്ച ശേഷം ഇങ്ങനെ തട്ടി കൊടുക്കാം. ഇനി ഭക്ഷണം കുടുങ്ങുന്നത് അന്നനാളത്തിലാണെങ്കിൽ കടുത്ത നെഞ്ചുവേദന. ചുമ എന്നിവ അനുഭവപ്പെടാം. ഇത്തരം സന്ദർഭങ്ങളിൽ കുറച്ച് വെള്ളം കുടിക്കുന്നത് നല്ലതാണ്. വാഴപ്പഴമോ മറ്റേതെങ്കിലും ഭക്ഷണമോ കഴിക്കാൻ ശ്രമിക്കുക. ചിലപ്പോൾ ഒരു ഭക്ഷണം മറ്റൊന്നിനെ അന്നനാളത്തിലേക്ക് തള്ളിവിടാൻ സഹായിക്കും. നിങ്ങൾക്ക് പഴം കഴിക്കാൻ ഇഷ്ടമല്ലെങ്കിൽ, ഒരു കഷണം ബ്രെഡ് വെള്ളത്തിലോ പാലിലോ മുക്കി കഴിക്കുക.
