കൊച്ചി: കേരളം ഭരിക്കുന്നത് മാഫിയ സംഘങ്ങളാണെന്ന് തുറന്നടിച്ച് നടൻ ജോയ് മാത്യു. കൊച്ചിയിൽ പത്ത് കൊല്ലമായി താൻ താമസിക്കുകയാണ്. കൊച്ചി കോർപ്പറേഷൻ ഭരിക്കുന്നതും മാഫിയ സംഘങ്ങളാണ്. അവരെ പേടിച്ചാണ് ബ്രഹ്മപുരം വിഷയത്തിൽ സാധാരണക്കാർ പ്രതികരിക്കാൻ ഭയക്കുന്നതെന്നും ജോയ് മാത്യു പറഞ്ഞു.
എങ്ങനെ പണം ഉണ്ടാക്കാമെന്നും എങ്ങനെ ജനങ്ങളെ ചൂഷണം ചെയ്യാമെന്നുമുള്ള ചിന്തയുള്ളവരാണ് കേരളം ഭരിക്കുന്നത്. ഇവരെല്ലാം ക്വട്ടേഷൻ സംഘങ്ങളാണ്. ജനങ്ങളോട് ഇവിടുത്തെ ഭരണകർത്താക്കൾക്ക് യാതൊരു വിധത്തിലുമുള്ള പ്രതിബദ്ധതയില്ല. ഭരണപക്ഷത്ത് വരുന്ന യുഡിഎഫ് ആയാലും എൽഡിഎഫ് ആയാലും അങ്ങനെ തന്നെയാണ്.
എൽഡിഎഫ് ഭരിക്കുമ്പോൾ യുഡിഎഫ് കുറ്റപ്പെടുത്തും യുഡിഎഫ് ഭരിക്കുമ്പോൾ എൽഡിഎഫ് കുറ്റപ്പെടുത്തും. ജനങ്ങൾക്ക് മുന്നിൽ ഇവർ ഒരു പുകമറ സൃഷ്ടിക്കുന്നു എന്ന് മാത്രം. ഇതെല്ലാം ഇവർ ഒരുമിച്ചുള്ള പരിപാടിയാണ്. ഇവർക്കെതിരെ പ്രതികരിക്കാൻ ആരുമില്ല. മാലിന്യം തള്ളാൻ മുൻ കൈ എടുക്കുന്നവരുടെ വീടിന് മുന്നിൽ മാലിന്യം കൊണ്ടിടാൻ ആർക്കെങ്കിലും ധൈര്യമുണ്ടോ. അവർക്കെല്ലാം ഇവിടം ഭരിക്കുന്ന ക്വട്ടേഷൻ സംഘത്തെ പേടിയാണ് എന്നും ജോയ് മാത്യു പഞ്ഞു.
