കഴിഞ്ഞ ദിവസമാണ് ബോളിവുഡ് നടി മാധുരി ദീക്ഷിതിന്റെ അമ്മ മരണപ്പെട്ടത്. വാര്‍ധക്യസഹജമായ അസുഖങ്ങളെ തുടർന്നായിരുന്നു സ്‌നേഹലത ദീക്ഷിതിന്റെ മരണം. ഇതിന് പിന്നാലെ അമ്മയെ കുറിച്ചുള്ള വേദനാജനകമായ കുറിപ്പ് പങ്കുവെച്ചിരിക്കുകയാണ് മകളും നടിയുമായ മാധുരി ദീക്ഷിത്.
രാവിലെ ഉണര്‍ന്നപ്പോള്‍ അമ്മയുടെ മുറി ശൂന്യമായിരുന്നു. എല്ലാം ഒരു സ്വപ്നം പോലെ തോനുന്നു എന്നും സമൂഹമാദ്ധ്യമത്തിൽ പങ്കുവെച്ച കുറിപ്പിൽ പറയുന്നുണ്ട്. ജീവിതത്തെ മുറുകെപിടിക്കാനും ആഘോഷിക്കാനുമെല്ലാം പഠിപ്പിച്ചത് അമ്മയാണെന്നും മാധുരി ഇന്‍സ്റ്റഗ്രാമില്‍ പങ്കുവെച്ച കുറിപ്പില്‍ കൂട്ടിചേർക്കുന്നുണ്ട്.
“ഇന്ന് രാവിലെ ഉണർന്നപ്പോൾ അമ്മയുടെ മുറി ശൂന്യമായിരുന്നു. അത് ഒരു സ്വപ്നം പോലെയാണ് തോന്നുന്നത്. ജീവിതത്തെ ഉൾക്കൊള്ളാനും ആഘോഷിക്കാനും അമ്മ ഞങ്ങളെ പഠിപ്പിച്ചു. ഒരുപാട് ആളുകളെ അമ്മ സഹായിച്ചിട്ടുണ്ട്. അമ്മയെ ഞങ്ങൾ വളരെയധികം മിസ് ചെയ്യും, അമ്മയുടെ ഓർമ്മകളിൽ ജീവിക്കും. അമ്മയുടെ ബുദ്ധിയും പ്രസരിപ്പും ഏവരെയും ആകർഷിക്കുന്നതാണ്. ഓർമ്മകളിലൂടെ ഞങ്ങൾ ജീവിതം ഒരുമിച്ച് ആഘോഷിക്കും.”- മാധുരി ഇൻസ്റ്റാഗ്രാമിൽ കുറിച്ചു.
