ബഹിരാകാശത്ത് വെച്ച് ആദ്യമായി ചിത്രീകരിച്ച ഫീച്ചർ സിനിമ റിലീസിനൊരുങ്ങുന്നു. ‘ദി ചലഞ്ച്’ എന്നപേരിൽ ചിത്രം ഒരുക്കിയിരിക്കുന്നത് റഷ്യൻനിർമാതാക്കളാണ്. ക്ലിം ഷിപെങ്കോയാണ് സിനിമ സംവിധാനം ചെയ്തത്. 2021ല് 12 ദിവസം ചെലവിട്ടാണ് രാജ്യാന്തര ബഹിരാകാശ നിലയത്തില് ഈ റഷ്യന് സിനിമ ചിത്രീകരിച്ചിരിക്കുന്നത്. സിനിമ ഏപ്രിൽ 12-ന് റിലീസ് ചെയ്യും.
നേരത്തെ ഇതിന്റെ ട്രെയിലർ പുറത്തിറങ്ങിരുന്നു. അബോധാവസ്ഥയിലായ സഞ്ചാരിക്ക് ഹൃദയശസ്ത്രക്രിയ നടത്താൻ സർജനും സംഘവും ബഹിരാകാശനിലയത്തിലേക്ക് പോകുന്നതാണ് ചിത്രത്തിന്റെ പ്രമേയം. സിനിമയിൽ സർജനായി വേഷമിട്ടിരിക്കുന്നത് റഷ്യൻ നടി യൂരിയ പെരിസിൽഡാണ്. ബഹിരാകാശയാത്രികനായ ഒലെഗ് നോവിറ്റ്സ്കിയാണ് രോഗിയുടെ വേഷത്തിലെത്തുക. ചിത്രത്തിലെ 40 മിനിറ്റാണ് ബഹിരാകാശത്ത് ചിത്രീകരിച്ചത്. റഷ്യന് ബഹിരാകാശ ഏജന്സിയായ റോസ്കോസ്മോസും റഷ്യയിലെ ചാനല് വണ്ണും യെല്ലോ, ബ്ലാക്ക് ആൻഡ് വൈറ്റ് സ്റ്റുഡിയോ എന്നിവർ സംയുക്തമായാണ് നിർമാണം.
