തെന്നിന്ത്യൻ താരം സാമന്ത നായികയാകുന്ന ഏറ്റവും പുതിയ സിനിമയാണ് ‘ശാകുന്തളം’. മഹാഭാരതത്തിലെ ശകുന്തള-ദുഷ്യന്തൻ പ്രണയകഥയായ കാളിദാസന്റെ അഭിജ്ഞാന ശാകുന്തളം’ എന്ന കൃതിയെ ആസ്പദമാക്കി ഒരുങ്ങുന്ന ഈ സിനിമയിൽ സാമന്ത ശകുന്തളയായി എത്തുമ്പോൾ സൂഫിയും സുജാതയും എന്ന ചിത്രത്തിലൂടെ ശ്രദ്ധേയനായ മലയാളത്തിന്റെ യുവ താരം ദേവ് മോഹനാണ് ദുഷ്യന്തനാവുന്നത്.
ഗുണശേഖർ സംവിധാനം ചെയ്യുന്ന പുതിയ ചിത്രം ഏപ്രിൽ 14-ന് റിലീസ് ചെയ്യുമെന്നാണ് അറിയിച്ചിരിക്കുന്നത്. അദിതി ബാലൻ അനസൂയായും മോഹൻ ബാബു ദുർവാസാവ് മഹർഷിയായും എത്തുമെന്നാണ് റിപ്പോർട്ട്. കൂടാതെ സച്ചിൻ ഖേദേക്കർ കബീർ ബേദി, മധുബാല, ഗൗതമി, അനന്യ നാഗല്ല, ജിഷു സെൻഗുപ്ത എന്നിവരും ചിത്രത്തിലുണ്ട്. ഐക്കൺ സ്റ്റാർ അല്ലു അർജുന്റെ മകൾ അല്ലു അർഹയും ചിത്രത്തിൽ ഒരു പ്രധാന വേഷം ചെയ്യുന്നുണ്ട്.
ഇപ്പോഴിതാ ശാകുന്തളം കണ്ട് സന്തോഷം പങ്കുവെച്ച് രംഗത്ത് എത്തിയിരിക്കുകയാണ് സാമന്ത. ട്വിറ്ററിലൂടെയാണ് താരം സന്തോഷം പങ്കുവെച്ചിരിക്കുന്നത്.’ഞാൻ ഇന്ന് സിനിമ കണ്ടു. എന്ത് മനോഹരമായ ഒരു സിനിമ. നമ്മുടെ മികച്ച ഇതിഹാസ കാവ്യങ്ങളിൽ ഒന്നിന് ജീവൻ നൽകി. കുടുംബ പ്രേക്ഷകർ ഇത് കാണുന്നതിനായി തനിക്ക് കാത്തിരിക്കാനാവുന്നില്ല. ‘ശാകുന്തളം’ എക്കാലവും പ്രിയപ്പെട്ടതായിരിക്കും’- സാമന്ത ട്വീറ്റ് ചെയ്തു.
https://twitter.com/Samanthaprabhu2/status/1635530410108043264?s=20
അതേസമയം ബോളിവുഡിലും അരങ്ങേറാൻ തയ്യാറെടുക്കുകയാണ് സാമന്ത. ദിനേഷ് വിജൻ നിർമിക്കുന്ന ചിത്രത്തിലാണ് സാമന്ത ഹിന്ദിയിൽ നായികയാകുകയെന്നും ആയുഷ്മാൻ ഖുറാനെയായിരിക്കും ചിത്രത്തിലെ നായകൻ എന്നും മുൻപ് വാർത്തകൾ വന്നിരുന്നു. ചിത്രത്തിൽ സാമന്ത ഇരട്ടവേഷത്തിലായിരിക്കും അഭിനയിക്കുക എന്നും റിപ്പോർട്ടുണ്ട്. ബോളിവുഡിലെ കന്നി ചിത്രത്തിന് വേണ്ടി സാമന്ത ഒരു ശിൽപ്പശാലയിൽ പങ്കെടുക്കുന്നുവെന്നും വാർത്തകൾ പുറത്തുവന്നിരുന്നു.
