തിരുവനന്തപുരം: അന്താരാഷ്ട്ര ചെറുധാന്യ(മില്ലറ്റ്) വർഷത്തോടനുബന്ധിച്ച് പാപ്പനംകോട് സിഎസ്ഐആർ-എൻഐഐഎസ്ടി ക്യാമ്പസിൽ മില്ലറ്റ് ഫുഡ് ഫെസ്റ്റിവലും സ്റ്റാർട്ടപ്പ് കോൺക്ലേവും സംഘടിപ്പിച്ചു. കഴിഞ്ഞ ദിവസം ആരംഭിച്ച സമ്മേളനം ജൈവ ഉല്പന്നങ്ങളാൽ സമൃദ്ധമാണ്. 18 വരെ നീളുന്ന മില്ലറ്റ് ഫെസ്റ്റിവൽ രാവിലെ 10 മുതൽ വൈകീട്ട് 7 വരെ ഉണ്ടാകും. പ്രവേശനം തികച്ചും സൗജന്യമാണ്.
ഭാരതത്തിന്റെ നിർദ്ദേശത്തെ തുടർന്ന് ഐക്യരാഷ്ട്ര സഭയുടെ കാർഷിക സംഘടന (എഫ്എഒ) 2023-നെ അന്താരാഷ്ട്ര മില്ലറ്റ് വർഷമായി പ്രഖ്യാപിച്ചു. ചെറുധാന്യങ്ങളുടെ ഉപയോഗം ലോകമെമ്പാടും പ്രോത്സാഹിപ്പിക്കുന്നതിന് വേണ്ടിയായിരുന്നു ഇത്. ആഗോള ഭക്ഷ്യസുരക്ഷ ഉറപ്പാക്കുന്നതിൽ ചെറുധാന്യങ്ങൾക്കുള്ള പങ്ക് കണക്കിലെടുത്ത് ഭാരതത്തെ ഒരു പ്രധാന ചെറുധാന്യ ഉൽപ്പാദന കേന്ദ്രമായി ഉയർത്തുന്നതിനുള്ള പദ്ധതികൾ സമ്മേളനത്തിന്റെ ഭാഗമായി രൂപീകരിക്കും. ഇതിന്റെ ഭാഗമായി ചെറുധാന്യ കൃഷി പ്രോത്സാഹിപ്പിക്കാനും ചെറുധാന്യങ്ങളുടെയും മൂല്യവർദ്ധിത വസ്തുക്കളുടെയും ഉപഭോഗം വർദ്ധിപ്പിക്കാനും മില്ലറ്റ് ഫുഡ് ഫെസ്റ്റിവലിലൂടെ ലക്ഷ്യമിടുന്നു.
ചെറുധാന്യങ്ങളിൽ നിന്നുണ്ടാക്കിയ വൈവിധ്യമാർന്ന ഭക്ഷ്യോൽപന്നങ്ങളാണ് മില്ലറ്റ് ഫുഡ് ഫെസ്റ്റിവലിലെ മുഖ്യ ആകർഷണം. ചെറുധാന്യങ്ങളുടെ പൊടിയിൽ തുടങ്ങി ഇത് കൊണ്ടുണ്ടാക്കിയ ലഡു, വെർമിസിലി, വിവിധ തരം ബിസ്ക്കറ്റുകൾ വരെ നീളുന്ന വിപുലമായ ഭക്ഷണവിഭവങ്ങൾ ഈ ഫുഡ് ഫെസ്റ്റിവലിൽ ലഭ്യമാണ്. ഏത് പ്രായത്തിലുള്ളവർക്കും പ്രമേഹ ബാധിതർക്കും ഒരുപോലെ ഭക്ഷിക്കാൻ കഴിയുമെന്നതാണ് ചെറുധാന്യഭക്ഷണത്തിനെ വ്യത്യസ്തമാക്കുന്നത്. പ്രിസർവേറ്റീവുകൾ ചേർക്കാത്തതും മൈദയുടെ അംശമില്ലാത്തതും കൃത്രിമ നിറങ്ങളില്ലാത്തതുമായ ജൈവ ഉല്പന്നങ്ങളുടെ സ്റ്റാളുകൾ സന്ദർശിക്കാം. ഒപ്പം മിതമായ നിരക്കിൽ ഭക്ഷ്യോൽപന്നങ്ങൾ വാങ്ങുകയും ചെയ്യാം. പേൾ മില്ലറ്റ് (കമ്പം), ഫോക്സ്ടെയിൽ മില്ലറ്റ് (തിന), പ്രോസോ മില്ലറ്റ് (പനിവരഗ്), ഫിംഗർ മില്ലറ്റ് (പഞ്ഞപ്പുല്ല്/റാഗി), കോഡോ മില്ലറ്റ് (വരഗ്), ബർനിയാർഡ് മില്ലറ്റ് (കുതിരവാലി), ലിറ്റിൽ മില്ലറ്റ് (ചാമ) തുടങ്ങി 200-ലധികം ചെറുധാന്യ ഭക്ഷണവിഭവങ്ങൾ ഈ സ്റ്റാളുകളിൽ നിന്ന് ലഭിക്കും.
അതേസമയം സിഎസ്ഐആറിന്റെ കീഴിലെ രാജ്യത്തെ 37 ലബോറട്ടറികളിൽ ഒരാഴ്ച നീളുന്ന വൺ വീക്ക് വൺ ലാബ് പ്രോഗ്രാമിന്റെ ഭാഗമായി തിരുവനന്തപുരം എൻഐഐഎസ്ടിയിൽ നടക്കുന്ന സമ്മേളനത്തിൽ വിവിധ വിഷയങ്ങളിൽ ചർച്ച നടക്കും. ചെറുധാന്യങ്ങളിൽ നിന്നുള്ള പുതിയ മൂല്യ വർധിത ഉല്പന്നങ്ങളുടെ നിർമ്മാണം, സ്റ്റാർട്ടപ്പ് സംരംഭങ്ങളുടെ വ്യാപ്തി, പുതിയ സാങ്കേതിക വിദ്യയും സുസ്ഥിരവുമായ കൃഷിരീതികളും സ്വീകരിക്കൽ, ചെറുധാന്യ അധിഷ്ഠിത ഉത്പന്നങ്ങളുടെ കയറ്റുമതി പ്രോത്സാഹനം, ചെറുധാന്യങ്ങളും അവയുടെ മൂല്യവർദ്ധിത ഉൽപ്പന്നങ്ങളും ആഗോളതലത്തിൽ പ്രദർശിപ്പിക്കുന്നതിനുള്ള മാർഗങ്ങൾ തുടങ്ങിയ വിഷയങ്ങളാണ് ചർച്ച ചെയ്യുക. മാത്രമല്ല ചെറുധാന്യ ഭക്ഷ്യശാലകൾ, കർഷക സംഗമം, ചെറുകിട സംരംഭക സംഗമം, പാചകമത്സരം, ചെറുധാന്യ അവബോധ പരിപാടി, പാചക വിദഗ്ധരുടെ നൈപുണ്യ പ്രദർശനം, സാംസ്കാരിക പരിപാടികൾ, ബി 2 ബി കൗണ്ടർ എന്നിവയും സമ്മേളനത്തിനോടനുബന്ധിച്ച് നടത്തപ്പെടുന്നുണ്ട്.
Comments