ന്യൂഡൽഹി: ഗോവയിൽ നടക്കാനിരിക്കുന്ന ഷാങ്ഹായ് ഉച്ചകോടിക്ക് മുന്നോടിയായി രാജ്യത്ത് നടക്കുന്നത് ടൂറിസം അനുബന്ധ അന്താരാഷ്ട്ര പരിപാടികൾ. ഷാങ്ഹായ് കോപ്പറേഷനിലെ അംഗരാജ്യങ്ങളിലെ ടൂറിസം മന്ത്രിമാരുടെ യോഗം, എസ്സിഒ ഫുഡ് ഫെസ്റ്റിവൽ എന്നിവയാണ് ടൂറിസവുമായി ബന്ധപ്പെട്ട പ്രധാന പരിപാടികൾ.
സൗത്ത് ഏഷ്യ ട്രാവൽ ആൻഡ് ടൂറിസം എക്സ്ചേഞ്ചിലാണ് പരിപാടികൾ നടത്താൻ ടൂറിസം മന്ത്രാലയം തീരുമാനം കൈക്കൊണ്ടത്. ഇതിന്റെ ഭാഗമായുള്ള ഷാങ്ഹായ് കോപ്പറേഷനിലെ അംഗരാജ്യങ്ങളിലെ ടൂറിസം മന്ത്രിമാരുടെ യോഗം മാർച്ച് 13 ന് വാരണാസിയിൽ ആരംഭിച്ചിരുന്നു. ഈ മാസം 17 വരെ യോഗം നീണ്ടുനിൽക്കും. തുടർന്ന് എസ്സിഒ ഫുഡ്ഫെസ്റ്റിവൽ ഏപ്രിൽ 13 മുതൽ 19 വരെ മുംബൈയിൽ വെച്ച് നടക്കും. അംഗരാജ്യങ്ങൾക്ക് അവരുടെ ടൂറിസം മേഖലയെയും സംസ്കാരത്തെയും പരിചയപ്പെടുത്താനുള്ള വേദിയൊരുക്കുക എന്നതാണ് ഈ പരിപാടികൾ കൊണ്ട് അദ്ധ്യക്ഷസ്ഥാനം വഹിക്കുന്ന ഇന്ത്യ ലക്ഷ്യമിടുന്നത്.
2001 ൽ ഷാങ്ഹായിൽ രൂപികരിച്ച സംഘടനയായ എസ്സിഒ യിൽ 2017 ലാണ് ഇന്ത്യ ഭാഗമാകുന്നത്. 2022 ൽ ഉസ്ബക്കിസ്ഥാനിലെ സബർഖണ്ഡിൽ ചേർന്ന യോഗത്തിൽ ഇന്ത്യയ്ക്ക് അദ്ധ്യക്ഷ പദവി കൈമാറുകയായിരുന്നു. 2023 മേയിൽ ഗോവയിൽ വെച്ചാണ് ഇന്ത്യയുടെ അദ്ധ്യക്ഷതയിൽ ഷാങ്ഹായ് കോപ്പറേഷൻ ഓർഗനൈസേഷന്റെ അടുത്ത ഉച്ചകോടി നടക്കുന്നത്.
Comments