ആരോഗ്യമുള്ള ശരീരത്തിന് പ്രധാനമാണ് ആരോഗ്യകരമായ ഭക്ഷണശീലം. ആരോഗ്യമുള്ള ശരീരത്തിന് പിന്നിൽ ആരോഗ്യമുള്ള എല്ലുകളാണ്. എല്ലുകളുടെയും പേശികളുടെയും ആരോഗ്യക്ഷമതയ്ക്ക് ചില പ്രത്യേക വിറ്റാമിനുകളും ധാതുക്കളും ആവശ്യമാണ്. അതിനാൽ പോഷക സമൃദ്ധമായ ഭക്ഷണം ശീലമാക്കുകയാണ് വേണ്ടത്.
അസ്ഥികളുടെ ആരോഗ്യത്തിന് കാത്സ്യം മാത്രമാണ് വേണ്ടത് എന്നാണ് ഭൂരിഭാഗം ആളുകളും കരുതുന്നത്. എന്നാൽ അസ്ഥികളുടെ ആരോഗ്യത്തിന് വിറ്റാമിൻ ഡി, കെ, എ, പ്രോട്ടീൻ, സിങ്ക് തുടങ്ങിയവ ആവശ്യമാണ്. ഇവ ചേർന്ന ആഹാരമാണ് നാം ഡയറ്റിൽ ഉൾപ്പെടുത്തേണ്ടത്.
പ്രോട്ടീൻ കലവറയായ മുട്ടയാണ് പതിവായി ഭക്ഷണത്തിൽ ഉൾപ്പെടുത്തേണ്ട ഒന്ന്. കാത്സ്യത്തെ ശരീരത്തിലേക്ക് ആഗിരണം ചെയ്യാൻ സഹായിക്കുന്ന വിറ്റാമിൻ ഡിയും മുട്ടയിലുണ്ട്. അതിനാൽ മുട്ട ഉൾപ്പെടുത്തുന്നത് മികച്ച ആരോഗ്യം നൽകും. എല്ലുകളെ പവർഫുള്ളാക്കാൻ സഹായിക്കുന്ന മറ്റൊന്നാണ് ഇലക്കറികൾ. പോഷകമൂല്യമേറെയുള്ള ചീര ദിവസവും കഴിക്കുന്നത് നല്ലതാണ്. ശരീരത്തിന് ഒഴിച്ചുകൂടാനാകാത്ത വിറ്റാമിനുകളും ധാതുക്കളും ചീരയിൽ അടങ്ങിയിട്ടുണ്ട്.
പയറുവർഗങ്ങളും ഭക്ഷണത്തിൽ ഉൾപ്പെടുത്തേണ്ടതാണ്. സിങ്ക് ധാരാളമായി അടങ്ങിയിരിക്കുന്ന ഭക്ഷണമാണ് പയർവർഗങ്ങൾ. ഇതിൽ കൊഴുപ്പ് കുറവാണ്. പ്രോട്ടീൻ, ഫൈബർ എന്നിവയും പയർവർഗങ്ങളിൽ അടങ്ങിയിട്ടുണ്ട്. ഡാർക്ക് ചോക്ലേറ്റിൽ അടങ്ങിയിരിക്കുന്ന ആന്റി ഓക്സിഡന്റുകൾ എല്ലുകളുടെ ആരോഗ്യത്തിന് നല്ലതാണ്. ഇവയും ഡയറ്റിൽ ഉൾപ്പെടുത്തുന്നത് നല്ലതാണ്. ചീസും മികച്ചതാണ്. കാത്സ്യവും പ്രോട്ടീനും ഇവയിൽ അടങ്ങിയിട്ടുണ്ട്. ചീസിന് പുറമേ പാലുത്പന്നങ്ങളും ദിവസവും കഴിക്കണം. പ്രോട്ടീന്റെ മികച്ച സ്രോതസ്സാണ് യോഗർട്ട്. കൊഴുപ്പിന്റെ അളവ് കുറഞ്ഞതും കാത്സ്യം കൂടുതലുമുള്ള ഒന്നാണ് യോഗർട്ട്.
Comments