കോംപാക്ട് എസ്യുവിയായ ബ്രെസ്സയുടെ പുതിയ സി.എൻ.ജി പതിപ്പ് വിപണിയിലെത്തി. ‘ബ്രെസ്സ എസ്-സി.എൻ.ജി’ എന്ന പേരിലാണ് മാരുതി സുസൂക്കി ഇത് വിപണിയിലെത്തിച്ചിരിക്കുന്നത്. കിലോഗ്രാമിന് 25.51 കിലോമീറ്ററാണ് പുതിയ ബ്രെസ്സ എസ്-സി.എൻ.ജി വാഗ്ദാനം ചെയ്യുന്നത്. 9.14 ലക്ഷം രൂപ മുതലാണ് എക്സ്ഷോറൂം വില. ഉയർന്ന വേരിയന്റായ സെഡ് എക്സ് ഐയ്ക്കു 11.90 ലക്ഷം രൂപയാണ് വില. പെട്രോൾ മോഡലിനെക്കാളും 95000 രൂപ കൂടുതലുണ്ട് ഈ മോഡലിന്. കോംപാക്ട് എസ് യുവികളിൽ സിഎൻജി വകഭേദമുള്ള എക മോഡൽ നിലവിൽ മാരുതി ബ്രെസ്സ മാത്രമാണ്.
നിലവിലെ ബ്രെസ്സയിലുള്ള അതേ കെ-സീരീസ്, 1.5 ലിറ്റർ, ഡ്യുവൽ-ജെറ്റ്, ഡ്യുവൽ വി.വി.ടി എൻജിനാണ് ഇതിനും ഉള്ളത്. 5000 ആർ.പി.എമ്മിൽ 64.6 കെ.ഡബ്ള്യു കരുത്തുള്ള എൻജിനാണിത്. പരമാവധി ടോർക്ക് 4200 ആർ.പി.എമ്മിൽ 121.5 എൻ.എം എന്നിവയുമുണ്ട്.
ഇന്റീരിയറിലും എക്സ്റ്റീരിയറിലും കാര്യമായ മാറ്റങ്ങൾ ഇല്ലാതെയാണ് സിഎൻജി മോഡൽ പുറത്തിറങ്ങിയത്. ബ്ലാക്ക് നിറത്തിലാണ് ഇൻരീയർ ക്രമീകരിച്ചിരിക്കുന്നത്. ഉയർന്ന വേരിയൻറായ സെഡ് എക്സിൽ കൂടിയ 7.0 ഇഞ്ച് വലിപ്പമുള്ള സ്മാർട് പ്ലേ പ്രോ പ്ലസ് സിസ്റ്റത്തോട് കൂടിയ ടച്ച് സ്ക്രീൻ ഇൻഫൊ ടെയ്ൻമെൻറ് സിസ്റ്റമുണ്ട്. ഇത് കൂടാതെ വയർലെസ് ആൻഡ്രോയ്ഡ് ഓട്ടോ, ആപ്പിൾ കാർ പ്ലേ കണക്ടിവിറ്റിയും സജ്ജീകരിച്ചിട്ടുണ്ട്. പുഷ് ബട്ടൺ സ്റ്റാർട്ട് സ്റ്റോപ്, സൺറൂഫ്, ക്രൂസ് കൺട്രോൾ എന്നീ സവിശേഷതകളുമുണ്ട്.
