ന്യൂഡൽഹി : പ്രധാനമന്ത്രി നരേന്ദ്രമോദിയുമായി കൂടിക്കാഴ്ച നടത്തി ജപ്പാൻ പ്രധാനമന്ത്രി ഫ്യുമിയോ കിഷിദ. ഡൽഹിയിലെ ഹൈദരാബാദ് ഹൗസിൽ വച്ചാണ് കൂടിക്കാഴ്ച നടന്നത്. ഇരു രാജ്യങ്ങളും തമ്മിലുള്ള ബന്ധം ശക്തമാക്കാൻ ലക്ഷ്യമിട്ടുകൊണ്ടാണ് പ്രധാനമന്ത്രി നരേന്ദ്രമോദിയുമായി കിഷിദ കൂടിക്കാഴ്ച നടത്തിയത്.
ദ്വിദിന സന്ദർശനത്തിന്റെ ഭാഗമായാണ് കിഷിദ ഇന്ത്യയിൽ എത്തിയത്. ഇന്ത്യ-ജപ്പാൻ പങ്കാളിത്തം വിപൂലീകരിക്കുന്നതിനായാണ് നരേന്ദ്രമോദിയുമായി ചർച്ചകൾ നടത്തിയതെന്ന് ഫ്യുമിയോ കിഷിദ പറഞ്ഞു. ആരോഗ്യം, ഭക്ഷ്യസുരക്ഷ, ഊർജ്ജ സംരക്ഷണം തുടങ്ങിയവയെക്കുറിച്ചും ഇരുവരും ചർച്ച ചെയ്തു.
ഇരു രാജ്യങ്ങളും തമ്മിലുള്ള ഉഭയകക്ഷി ബന്ധം ശക്തിപ്പെടുത്തുന്നതിന് ലഭിച്ച മികച്ച ഒരു
അവസരമാണ് കിഷിദയുടെ സന്ദർശനമെന്ന് കേന്ദ്രമന്ത്രി രാജീവ് ചന്ദ്രശേഖർ പറഞ്ഞു. ഫ്യുമിയോ കിഷിദ രണ്ടാം തവണയാണ് ഇന്ത്യ സന്ദർശിക്കുന്നത്. ഇത്തവണത്തെ ജി7 അദ്ധ്യക്ഷത വഹിക്കുന്നത് ജപ്പാനാണ്. ഹിരോഷിമയിൽ നടക്കാനിരിക്കുന്ന ജി7 നേതാക്കളുടെ ഉച്ചകോടിയിൽ പധാനമന്ത്രി നരേന്ദ്രമോദിയെ ഫ്യുമിയോ കിഷിദ ക്ഷണിച്ചു.
Comments