അടുത്ത ചിത്രം ഏതെന്ന ചോദ്യത്തിൽ വലഞ്ഞ് നടൻ ജൂനിയർ എൻടിആർ. ആരാധകരുടെ ചോദ്യത്തിൽ മനം മടുത്ത താരം ഞെട്ടിക്കുന്ന പരാമർശമാണ് നടത്തിയിരിക്കുന്നത്. തന്റെ അടുത്ത ചിത്രത്തെക്കുറിച്ച് ചോദിച്ചാൽ താൻ സിനിമ ചെയ്യുന്നത് നിർത്തുമെന്നാണ് താരം ആരാധകരോട് തുറന്നടിച്ചത്. വിശ്വക് സെന്നിന്റെ വരാനിരിക്കുന്ന ചിത്രമായ ദാസ് കാ ധാംകിയുടെ ഹൈദരാബാദിൽ നടന്ന പ്രീ-റിലീസ് ചടങ്ങിൽ പങ്കെടുക്കവെയാണ് താരം ഇക്കാര്യം പറഞ്ഞത്.
താരം അഭിനയിച്ച ആർആർആർ സിനിമയിലെ നാട്ടുനാട്ടു ഗാനം ഓസ്‌കർ കരസ്ഥമാക്കിയിരുന്നു. ലോസ് ഏഞ്ചൽസിൽ നിന്നും ഹൈദരാബാദിലേക്ക് മടങ്ങിയെത്തിയ ശേഷം താരം പങ്കെടുത്ത ആദ്യത്തെ പൊതുചടങ്ങാണിത്. ചടങ്ങിനിടയിൽ വച്ച് അടുത്ത പ്രോജക്ടുകളെ കുറിച്ച് ചോദിച്ചപ്പോൾ ഇത്തരം ചോദ്യങ്ങൾ ആവർത്തിച്ചാൽ സിനിമ ചെയ്യുന്നത് നിർത്തുമെന്ന് അദ്ദേഹം തമാശയായി ആരാധകരോട് പറയുകയായിരുന്നു.
‘ഞാൻ സിനിമയൊന്നും ചെയ്യുന്നില്ല. നിങ്ങൾ ആവർത്തിച്ച് ചോദിച്ചാൽ, ഞാൻ സിനിമ ചെയ്യുന്നത് നിർത്തും. ”എന്നാൽ പിന്നീട് പറഞ്ഞത് തമാശയാണെന്നും സിനിമ ചെയ്യുന്നത് നിർത്താൻ തനിക്ക് പദ്ധതിയില്ലെന്ന് നടൻ ആരാധകരോട് പറയുകയായിരുന്നു.
ജൂനിയർ എൻടിആർ കൊരട്ടാല ശിവയ്‌ക്കൊപ്പം അടുത്ത ചിത്രം ചെയ്യും എന്നാണ് പുറത്തുവരുന്ന റിപ്പോർട്ടുകൾ. ജാൻവി കപൂർ ആണ് ചിത്രത്തിലെ നായിക എന്നും സൂചനകളുണ്ട്. 2024 ഏപ്രിൽ 5 ന് റിലീസ് ചെയ്യാൻ പദ്ധതിയിട്ടിരിക്കുകയാണ് ഈ ചിത്രം എന്നാണ് റിപ്പോർട്ടുകൾ.
