റഷ്യയിൽ നിന്ന് ബഹിരാകാശത്തേക്ക് പോയ ആദ്യ ജീവിയായ ലെയ്ക്കയുടെ പിൻഗാമി എന്നവകാശപ്പെടുന്ന നായയുടെ കഥ പറയുന്ന സിനിമയായ ‘ ലെയ്ക്ക’ മാർച്ച് 31-ന് തിയറ്റരുകളിലേക്ക്. ബിജു സോപാനവും നിഷാ സാരംഗുമാണ് ചിത്രത്തിൽ പ്രധാന വേഷങ്ങളിലെത്തുന്നത്. നടൻ അലൻസിയറാണ് ചിത്രത്തിലെ കേന്ദ്ര കഥാപാത്രമായ നായയ്ക്ക് ശബ്ദം നൽകിയിരിക്കുന്നത്.
രാജുവായി വേഷമിടുന്ന ബിജു സോപാനത്തിന്റെ വീട്ടിലെ വളർത്തുനായ ആണ് ‘ലെയ്ക്ക’. താൻ വലിയ നിലയിൽ ജീവിക്കേണ്ട ആളാണെന്നും നിവൃത്തികേട് കൊണ്ട് രാജുവിന്റെ കൂടിയ സഹിച്ചുകഴിയുകയാണെന്ന് അവകാശപ്പെടുന്ന നായ ആണ് ലെയ്ക്ക. ആഷാദ് ശിവരാമൻ സംവിധാനം ചെയ്യുന്ന ചിത്രത്തിൽ തെന്നിന്ത്യൻ താരം നാസറും മുഖ്യവേഷത്തിൽ എത്തുന്നുണ്ട്. ബഹിരാകാശ ഗവേഷണ കേന്ദ്രത്തിൽ സയന്റിസ്റ്റ് എന്ന് സ്വയം അവകാശപ്പെടുന്ന, എന്നാൽ അവിടത്തെ ലയ്ത്തിലെ പിയൂണായി ജോലി ചെയ്യുന്ന രാജു എന്ന പൊങ്ങച്ചക്കാരനായി ആണ് ബിജു സോപാനം വേഷമിടുന്നത്. ഇദ്ദേഹത്തെ സ്നേഹിച്ചും എന്നാൽ നിർദോഷങ്ങളായ അയാളുടെ പൊങ്ങച്ചം കാരണം കഷ്ട്ടപ്പെടേണ്ടി വരുന്ന വീട്ടമ്മയായി നിഷാ സാരംഗും വേഷമിടുന്നു.
മലയാളത്തിലെ പ്രധാന താരങ്ങളായ സുധീഷ്, ബൈജു സന്തോഷ്, അരിസ്റ്റോ സുരേഷ്, സിബി തോമസ്, സേതുലക്ഷ്മി, നോബി മാർക്കോസ്, നന്ദനവർമ്മ തുടങ്ങിയവരും അഭിനയിക്കുന്നു. മലയാളത്തിലെ ഒട്ടനവധി ഹിറ്റുകളുടെ ക്യാമറമാൻ പി. സുകുമാറാണ് ലൈയ്ക്കയുടെ ക്യാമറാമാൻ. പത്രപ്രവർത്തകരായ പി. മുരളീധരനും ശ്യാം കൃഷ്ണയും ചേർന്നാണ് തിരക്കഥ രചിച്ചിട്ടുള്ളത്. സതീഷ് രാമചന്ദ്രനും ജെമിനി ഉണ്ണിക്കൃഷ്ണനും ഗാനങ്ങൾ ഒരുക്കിയപ്പോൾ റോണീ റാഫേൽ പശ്ചാത്തല സംഗീതം നിർവഹിച്ചു. ബി.ടി. അനിൽകുമാർ, ശാന്തൻ, പി. മുരളീധരൻ എന്നിവരാണ് ഗാനങ്ങളെഴുതിയത്. വിപിൻ മണ്ണൂരാണ് എഡിറ്റർ.
