ശരിയായ ഉറക്കം ലഭിക്കാതെ പ്രയാസപ്പെടുന്നവർ ധാരാളമാണ്. അതിന് പല കാരണങ്ങളുമുണ്ട്. മാനസികമായ വിഷമതകൾ കൊണ്ടും ഉറക്കം നഷ്ടമാകും. നല്ല ഉറക്കം ലഭിച്ചില്ലെങ്കിൽ പല ആരോഗ്യ പ്രശ്നങ്ങളും ഉണ്ടായേക്കും. പ്രമേഹം, തൈറോയ്ഡ്, ഹൈപ്പർടെൻഷൻ, പൊണ്ണത്തടി തുടങ്ങിയ വിവിധ ആരോഗ്യ പ്രശ്നങ്ങൾക്ക് ഉറക്കമില്ലായ്മ കാരണമാകും. ചില പോഷകങ്ങളുടെ അഭാവം ഉറക്ക പ്രശ്നങ്ങൾക്ക് കാരണമാകും. വിറ്റാമിനുകൾ എ, സി, ഡി, ഇ, കെ, കാൽസ്യം, മഗ്നീഷ്യം തുടങ്ങിയ പോഷകങ്ങളുടെ കുറവ് നല്ല ഉറക്കത്തിന് തടസ്സം നിൽക്കും. ഉറക്കമില്ലായ്മ പരിഹരിക്കാൻ ചില ഭക്ഷണങ്ങൾക്ക് സാധിക്കുമെന്ന് ആരോഗ്യ വിദഗ്ദർ വ്യക്തമാക്കിയിട്ടുണ്ട്.
പരിപ്പ് വർഗങ്ങൾ, വിത്തുകൾ, പഴങ്ങൾ, പച്ചക്കറികൾ തുടങ്ങിയ ഭക്ഷണങ്ങൾ വിറ്റാമിനുകളുടെ കലവറയാണ്, അവയിൽ ചിലത് ഉറക്ക പ്രശ്നങ്ങൾ പരിഹരിക്കുന്നതിന് വളരെ ഫലപ്രദമാണ്. ഉദാഹരണത്തിന്, ആയുർവേദം അനുസരിച്ച് ഉറക്ക പ്രശ്നങ്ങൾക്കുള്ള ഏറ്റവും നല്ല ഭക്ഷണ പദാർത്ഥമാണ് പിസ്ത. കാരണം അതിൽ വലിയ തോതിൽ മെലറ്റോണിൻ അടങ്ങിയിട്ടുണ്ട്. ഇത് ഒരാളെ നന്നായി ഉറങ്ങാൻ സഹായിക്കും. മഗ്നീഷ്യം, വിറ്റാമിൻ ബി 6 എന്നിവ ശരീരത്തിന് നൽകാൻ പിസ്തയ്ക്ക് കഴിയും. ഇത് സുഖകരമായ ഉറക്കത്തിന് സഹായിക്കുന്നു.
നമ്മുടെ മാനസികാവസ്ഥയെ സുസ്ഥിരമാക്കാൻ സഹായിക്കുന്ന ‘ഹാപ്പി ഹോർമോണായ’ സെറോടോണിന്റെ ഉൽപാദനത്തിൽ പങ്കുവഹിക്കുന്ന ഒരു അമിനോ ആസിഡാണ് ട്രിപ്റ്റോഫാൻ. ഉത്കണ്ഠ, ഉറക്കമില്ലായ്മ, അമിതമായ ഭക്ഷണ ആസക്തി, അമിതവണ്ണം എന്നിവയുള്ള ആളുകൾക്ക് പിസ്ത നല്ല ഭക്ഷണമാണ്. വിശപ്പ്, ലൈംഗിക ശക്തി, മാനസികാവസ്ഥ, ഉറക്കം എന്നിവ മെച്ചപ്പെടുത്താൻ പിസ്ത സഹായിക്കും. അവ ഹൃദയത്തിനും മികച്ചതാണ്. നല്ല ഉറക്കം ലഭിക്കാൻ പാടുപെടുന്നവർ മഗ്നീഷ്യം, മെലറ്റോണിൻ ഗുളികകൾ കഴിക്കുന്നതിനു പകരം ഉറങ്ങുന്നതിന് 1 മണിക്കൂർ മുമ്പ് ഒരു പിടി പിസ്ത കഴിക്കുന്നത് നല്ലതാണ്.
Comments