തിരുവനന്തപുരം: സംസ്ഥാനത്ത് കൊറോണ കേസുകളിൽ വീണ്ടും വർദ്ധന. ഇന്ന് മാത്രം സംസ്ഥാനത്ത് 765 പേർക്ക് കൊറോണ സ്ഥിരീകരിച്ചു. തിരുവനന്തപുരത്തും എറണാകുളത്തുമാണ് കൂടുതൽ കേസുകൾ റിപ്പോർട്ട് ചെയ്തത്. കൂടാതെ ഒരു മാസത്തിനിടെ സംസ്ഥാനത്ത് 20 കൊറോണ മരണങ്ങളും സ്ഥിരീകരിച്ചു.
60 വയസ്സിന് മുകളിൽ പ്രായമുള്ളവരാണ് മരിച്ചവരിൽ ഭൂരിഭാഗവും. നിലവിൽ കൊറോണ ബാധിച്ച് ഐസിയുവിൽ ചികിത്സയിൽ കഴിയുന്നവരിൽ കൂടുതൽ പ്രായമുള്ളവരാണ്. പ്രമേഹവും രക്തസമ്മർദവും അടക്കമുള്ള ജീവിതശൈലി രോഗങ്ങളുള്ളവരാണ് ഇതിൽ കൂടുതൽ. ഇത്തരം ജീവിത ശൈലി രോഗങ്ങൾ ഉള്ളവരും പ്രായമായവരും ഗർഭിണികളും കുട്ടികളും മാസ്‌ക് നിർബന്ധമായി ധരിക്കാനും നിർദേശമുണ്ട്. നിലവിൽ സംസ്ഥാനത്തെ ആശുപത്രികളിൽ മാസ്‌ക് നിർബന്ധമാക്കി.
കൊറോണയുടെ ഒമിക്രോൺ വകഭേദമാണ് ഇപ്പോൾ വ്യാപിക്കുന്നത്. ആർസിസി, മലബാർ കാൻസർ സെന്റർ, ശ്രീചിത്ര ആശുപത്രി, സ്വകാര്യ ആശുപത്രികൾ എന്നിവിടങ്ങളിൽ കൊറോണ രോഗികൾക്ക് പ്രത്യേകം കിടക്ക മാറ്റിവെക്കണമെന്ന് ആരോഗ്യവകുപ്പിന്റെ നിർദ്ദേശമുണ്ട്.
