ആഷിക് അബുവിനെതിരെ വക്കീൽ നോട്ടീസ് അയച്ച് എം.എസ്.ബാബുരാജിന്റെ കുടുംബം. ഭാർഗവീനിലയം എന്ന സിനിമയിലെ പാട്ടുകൾ റീമിക്സ് ചെയ്ത് നീലവെളിച്ചം എന്ന പുതിയ സിനിമയിൽ ഉപയോഗിക്കുന്നതിനെതിരെയാണ് പരാതി. നീലവെളിച്ചത്തിന്റെ സംവിധായകനും നിർമാതാവുമാണ് ആഷിഖ് അബു.
ബാബുരാജിന്റെ സംഗീതത്തിന്റെ സ്വാഭാവിക തനിമയും മാസ്മരികതയും നശിപ്പിക്കുന്ന റീമിക്സ് ഗാനങ്ങൾ സമൂഹമാദ്ധ്യമങ്ങളിൽ നിന്നും ടിവി ചാനലുകളിൽ നിന്നും പിൻവലിക്കണമെന്ന് നോട്ടിസിൽ ആവശ്യപ്പെടുന്നു. മന്ത്രി സജി ചെറിയാനും ബാബുരാജിന്റെ മകൻ എം.എസ്.ജബ്ബാർ പരാതി നൽകിയിട്ടുണ്ട്.
വൈക്കം മുഹമ്മദ് ബഷീറിന്റെ ‘നീലവെളിച്ചം’ എന്ന കഥയെ ആസ്പദമാക്കി 1964-ൽ എ.വിൻസന്റ് സംവിധാനം ചെയ്ത് പുറത്തിറക്കിയ ചിത്രമാണ് ഭാർഗവീനിലയം. ബഷീർ തന്നെയാണ് ഇതിന്റെ തിരക്കഥ രചിച്ചിരിക്കുന്നത്. ഈ കഥയെ അടിസ്ഥാനമാക്കി അതേപേരിൽ ടോവിനോയെ നായകനാക്കി ആഷിഖ് അബു സംവിധാനം ചെയ്യുന്ന ചിത്രമാണ് ‘നീലവെളിച്ചം’. ഭാർഗവീനിലയത്തിലെ പാട്ടുകൾ ‘നീലവെളിച്ച’ത്തിനു വേണ്ടി ബിജിബാലാണ് ഒരുക്കിയിരിക്കുന്നത്. എന്നാൽ, പാട്ടിനെ വികൃതമാക്കി എന്ന തരത്തിൽ പല കോണുകളിൽ നിന്നും അഭിപ്രായം ഉയർന്നിരുന്നു.
