നിത മുകേഷ് അംബാനി കൾച്ചറൽ സെന്ററിന്റെ ഉദ്ഘാടന ചടങ്ങിൽ ചാരുതയാർന്ന വേഷത്തിലെത്തി നിത അംബാനിയും മുകേഷ് അംബാനിയും.നീല ബനാറസി സാരിയിലാണ് നിതാ അംബാനി ചടങ്ങിനെത്തിയത്. നീലയും സ്വർണ നിറത്തിലുള്ള ബോർഡറുള്ള പരമ്പരാഗത കുന്ദൻ ആഭരണങ്ങളും ചാരുത വർദ്ധിപ്പിച്ചു. സാരിയ്ക്ക് അനുയോജ്യമായ മേക്കപ്പിനൊപ്പം വെള്ള പൂക്കൾ കൊണ്ട് അലങ്കരിച്ച മൃദുവായ റഷ്ൾസ് കൊണ്ട് മുടി മനോഹരമായി സ്റ്റൈൽ ചെയ്തിട്ടുണ്ട്. മരതകങ്ങൾ കൊണ്ടുള്ള നെക്ലേസ് ചടങ്ങിനെത്തിയവരുടെ മനം കവർന്നു.
മുംബൈ ബാന്ദ്ര-കുർള കോംപ്ലക്സിലെ ജിയോ വേൾഡ് സെന്ററിലാണ് നിത അംബാനി കൾച്ചറൽ സെന്ററിന്റെ ആസ്ഥാനം. ഇന്ത്യൻ കലയുടെയും സംസ്കാരത്തിന്റെയും ഏറ്റവും മികച്ച പ്രദർശന കേന്ദ്രമാണിവിടം. ഇന്ത്യയിലെ ഏറ്റവും അത്യാധുനികവും ഐതിഹാസികവും ലോകോത്തരവുമായ സാംസ്കാരിക കേന്ദ്രവും ദൃശ്യകലകളുടെ അവതരണ കേന്ദ്രവുമായ എൻഎംഎസിസി ഗംഭീരമായ അരങ്ങേറ്റത്തിന് ഒരുങ്ങുകയാണ് എന്നാണ് നിതാ അംബാനി പറഞ്ഞത്.
സാംസ്കാരിക കേന്ദ്രത്തിന് ജീവൻ നൽകിയത് ഒരു പുണ്യ യാത്രയാണ്. സിനിമയിലും സംഗീതത്തിലും നൃത്തത്തിലും നാടകത്തിലും സാഹിത്യത്തിലും നാടോടിക്കഥകളിലും കലയിലും കരകൗശലത്തിലും ശാസ്ത്രത്തിലും ആത്മീയതയിലും നമ്മുടെ കലാ-സാംസ്കാരിക പൈതൃകത്തെ പ്രോത്സാഹിപ്പിക്കുന്നതിനും ആഘോഷിക്കുന്നതിനുമുള്ള ഒരു ഇടം സൃഷ്ടിക്കാൻ ആഗ്രഹിക്കുന്നു. ഇന്ത്യയിലെ ഏറ്റവും മികച്ചത് ഞങ്ങൾ ലോകത്തിന് മുന്നിൽ പ്രദർശിപ്പിക്കുകയും ലോകത്തിലെ ഏറ്റവും മികച്ചവരെ ഇന്ത്യയിലേക്ക് സ്വാഗതം ചെയ്യുകയും ചെയ്യുന്ന ഇടമാണിത്- ചടങ്ങിൽ സംസാരിച്ച നിത അംബാനി പറഞ്ഞു.
