മല്ലു സിംഗ് എന്ന ചിത്രത്തിലൂടെ മലയാളികളുടെ മനസ്സിൽ ഇടംനേടിയ താരമാണ് ഉണ്ണി മുകുന്ദൻ. ചുരുങ്ങിയ കാലം കൊണ്ട് തന്നെ സിനിമയിൽ തന്റേതായൊരു സ്ഥാനം സ്വന്തമാക്കാൻ ഉണ്ണി മുകുന്ദന് സാധിച്ചു. അഭിനേതാവിന് പുറമേ താൻ നല്ലൊരു ഗായകനും നിർമ്മാതാവുമാണെന്ന് ഉണ്ണി ഇതിനോടകം തെളിയിച്ചു കഴിഞ്ഞു. ഇപ്പോഴിതാ തന്റെ ആദ്യ ഒഡിഷൻ വീഡിയോ പങ്കുവയ്ക്കുക ആണ് ഉണ്ണി മുകുന്ദൻ.
ഒരു ദശാബ്ദത്തിലേറെ ആയി സിനിമയിൽ ഉണ്ടെന്നും കൗമാരപ്രായത്തിൽ കണ്ട മിക്കവാറും എല്ലാ സ്വപ്നങ്ങളും നേടിയെടുത്തു. പുതിയ അഭിലാഷങ്ങളും ലക്ഷ്യങ്ങളുമായി മുന്നേറുകയാണ്. തങ്ങളുടെ ലക്ഷ്യത്തിന് വേണ്ടി പരിശ്രമിക്കുന്ന എല്ലാവർക്കുമായി, എന്റെ സ്വപ്നങ്ങളിലേക്കുള്ള യാത്രയിലെ ഈ പഴയ വീഡിയോ പങ്കുവയ്ക്കുക ആണ്. വീഡിയോയിലെ ആ ഓഡിഷനിൽ ഞാൻ തോറ്റിരുന്നു. അന്ന് എന്റെ ഹൃദയം വല്ലാതെ തകർന്നു. പക്ഷേ ആ റിജക്ഷൻ ഞാൻ മനസിലേക്കല്ല തലയിലേക്ക് ആണ് എടുത്തത്.
ലക്ഷ്യത്തിനായി കഠിനാധ്വാനം ചെയ്തു. എന്റെ സ്വപ്നങ്ങളുടെ സൗന്ദര്യത്തിൽ വിശ്വസിച്ച് എന്റെ ആന്തരികതയെ പരിപോഷിപ്പിച്ചതിന്റെ വിജയമാണ് ഇന്ന്. കഠിനാധ്വാനം ചെയ്യുന്ന ആൺകുട്ടികളോടും പെൺകുട്ടികളോടും എനിക്ക് പറയാനുള്ളത് ഇത്രമാത്രമാണ്, നിങ്ങൾ ഒരിക്കലും സ്വയം കൈവിടരുത്. എന്നാണ് വീഡിയോയ്ക്ക് ഒപ്പം ഉണ്ണി മുകുന്ദൻ കുറിച്ചത്.
മാളികപ്പുറം ആണ് ഉണ്ണിമുകുന്ദന്റേതായി ഏറ്റവും ഒടുവിൽ പുറത്തുവന്ന ചിത്രം. വിഷ്ണു ശശിശങ്കർ ആയിരുന്നു സംവിധാനം.
