മലയാള സിനിമയ്‌ക്ക് മോഹൻലാലും മമ്മൂട്ടിയും നൽകിയ സംഭാവനകൾ ചെറുതല്ലെന്ന് സംവിധായകൻ പ്രിയദർശൻ. മലയാള സിനിമയ്‌ക്ക് ബഹുമാനം ഉണ്ടാക്കി നൽകാൻ ഇരുവർക്കും കഴിഞ്ഞെന്നും പ്രിയദർശൻ പറഞ്ഞു. തന്റെ ഏറ്റവും പുതിയ ചിത്രമായ കൊറോണ പെപ്പേഴ്സിന്റെ റിലീസിനോടനുബന്ധിച്ച് നടത്തിയ പ്രസ്മീറ്റിൽ സംസാരിക്കുകയായിരുന്നു അദ്ദേഹം.
മലയാള സിനിമയുടെ രണ്ട് തൂണുകളാണ് മോഹന്‍ലാലും മമ്മൂട്ടിയും. ഒരു കാലത്ത് അന്ന് മലയാള സിനിമക്ക് നല്ല ചീത്തപ്പേരുണ്ടായിരുന്നു അത് മാറ്റിയതും ഇവരാണെന്നും പ്രിയ ദർശൻ പറഞ്ഞു. അതുകൊണ്ട് തന്നെ ഇന്നത്തെ തലമുറയിലെ നടന്മാര്‍ക്ക് ഇരുവരുടെയും പിന്‍ഗാമികളാണെന്ന് ധൈര്യത്തോടെ പറയാന്‍ സാധിക്കുമെന്നും അദ്ദേഹം വ്യക്തമാക്കി.
‘മോഹന്‍ലാലും മമ്മൂട്ടിയുമെന്ന് പറയുന്നത് സത്യം പറഞ്ഞാല്‍ മലയാള സിനിമയുടെ രണ്ട് തൂണുകളാണ്. അവരില്ലാതെ മലയാള സിനിമയ്‌ക്ക് ഇന്നുള്ള സ്റ്റാറ്റസ് ഒരിക്കലും ഉണ്ടാകില്ലായിരുന്നു. കാരണം ഒരു കാലത്ത് മലയാള സിനിമയ്‌ക്ക് കേരളത്തിന് പുറത്തൊക്കെ നല്ല ചീത്തപ്പേരുണ്ടായിരുന്നു. സോഫ്റ്റ് പോണ്‍ ഫിലിംസ് എന്നൊക്കെ പറയുന്ന സമയമുണ്ടായിരുന്നു.
അതെല്ലാം മാറി ബഹുമാനം ഉണ്ടാക്കി തന്നതിന്റെ പൂര്‍ണ ഇത്തരവാദിത്തം ഇവര്‍ക്ക് രണ്ടുപേര്‍ക്കുമാണ്. അതുകൊണ്ട് തന്നെ ഇന്നത്തെ ജനറേഷൻ ഉള്‍പ്പടെ അഹങ്കാരത്തടെ പറയാവുന്ന കാര്യമാണ് അവര്‍ രണ്ടു പേരും ഞങ്ങളുടെ മുന്‍ഗാമികളാണെന്ന്’- പ്രിയദർശൻ പറഞ്ഞു.
