കോഴിക്കോട് : എലത്തൂർ ട്രെയിൻ ആക്രമണ കേസിൽ പ്രതിയെ തിരഞ്ഞ് അന്വേഷണസംഘം നോയിഡയിൽ. കോഴിക്കോട് സ്റ്റേഷനിലെ രണ്ടു ഉദ്യോഗസ്ഥരാണ് പ്രതിയെ തിരഞ്ഞ് നോയിഡയിലേക്ക് പോയത്. വിമാനമാർഗ്ഗമാണ് ഇവർ പോയത്. പ്രതിയെന്ന് സംശയിക്കുന്ന ഷഹറൂഖ് സെയ്ഫിയുടെ പശ്ചാത്തലം കണ്ടെത്തുകയാണ് നോയിഡയിലേക്ക് സംഘത്തിന്റെ ലക്ഷ്യം. തീവ്രവാദ ബന്ധമുണ്ടെന്ന് സംശയിക്കുന്നതിനാൽ എൻഐഎയും അന്വേഷണം നടത്തുന്നുണ്ട്.
പ്രതിയ്ക്കായി തിരച്ചിൽ ഊർജ്ജിതമാണെന്ന് അന്വേഷണസംഘം അറിയിച്ചു. ഇന്നലെ തൃശ്ശൂരിൽ നിന്ന് തിരിച്ച നാലംഗ അന്വേഷണസംഘം ഗാസിയാബാദിലെത്തിയിരുന്നു. പ്രതിയെന്ന് സംശയിക്കുന്ന ഷഹറൂഖ് സെയ്ഫി ഡൽഹിയിലേക്ക് തിരിച്ചതായി അന്വേഷണ സംഘത്തിന് സൂചന ലഭിച്ചിരുന്നു. ഇയാൾ ഡൽഹിയിലെത്തിയാൽ അറസ്റ്റ് ചെയ്യാനുള്ള നടപടിയിലേക്കാണ് അന്വേഷണസംഘം നീങ്ങുന്നത്. കോഴിക്കോട് നിന്നുള്ള അന്വേഷണസംഘവും ഡൽഹിയിലുണ്ട്.
അതേസമയം നിലവിൽ ആർപിഎഫ് ഐജി ജി.എം ഈശ്വരറാവു ഡി1 ബോഗിയിൽ പരിശോധനനടത്തുകയാണ്. റെയിൽവേ യാത്രക്കാരുടെ സുരക്ഷ വർധിപ്പിക്കുമെന്ന് അദ്ദേഹം പറഞ്ഞു. സ്റ്റേഷനുകളിൽ സ്കാനറുകൾ സ്ഥാപിക്കുമെന്നും ചെറിയ സ്റ്റേഷനുകളിലും ട്രെയിനിന്റെ കമ്പാർട്ട്മെന്റുകളിലും സിസിടിവി ക്യാമറ സ്ഥാപിക്കുമെന്ന് അദ്ദേഹം അറിയിച്ചത്.
Comments