ശ്രീനഗർ: ഭാരതത്തിലെ യുവാക്കൾ അന്താരാഷ്‌ട്ര ക്രിക്കറ്റിൽ ഇന്ത്യക്കായി കളിക്കാൻ ആഗ്രഹിക്കുന്നതായി മുൻ ശ്രീലങ്കൻ ക്രിക്കറ്റ് താരം സനത് ജയസൂര്യ. കശ്മീർ സന്ദർശിച്ചപ്പോൾ നിരവധി കഴിവുള്ള യുവാക്കളെ കാണാൻ സാധിച്ചുവെന്നും അവർക്കെല്ലാം ഇന്ത്യക്കായി പാഡണിയണമെന്നാണ് ആഗ്രഹമെന്നും സനത് ജയസൂര്യ പറഞ്ഞു.
ജമ്മുകശ്മീരിലെ ശ്രീനഗർ ഡൂൺ ഇന്റർനാഷണൽ സ്‌കൂളിൽ വളർന്നുവരുന്ന ക്രിക്കറ്റ് താരങ്ങളുമായി സംവദിക്കുകയായിരുന്നു അദ്ദേഹം. താഴ്വരയിലെ വളർന്നുവരുന്ന ക്രിക്കറ്റ് കളിക്കാരുമായി അദ്ദേഹം പ്രത്യേക സംവേദനാത്മക സെഷനും നടത്തി. ശ്രീലങ്ക സന്ദർശിക്കാനും അദ്ദേഹം ജനങ്ങളോട് അഭ്യർത്ഥിച്ചു.
‘കശ്മീരിലെ നിരവധി സ്ഥലങ്ങൾ സന്ദർശിച്ചു. അവിടെയെല്ലാം ക്രിക്കറ്റിന് വലിയ സ്വീകാര്യതയാണുള്ളത്. ക്രിക്കറ്റിൽ ഭാവിയുള്ള നിരവധി യുവാക്കളെ കാണാൻ സാധിച്ചു. അവരെല്ലാം ആഗ്രഹിക്കുന്നത് ഇന്ത്യയ്‌ക്ക് വേണ്ടി അന്താരാഷ്‌ട്ര മത്സരങ്ങൾ കളിക്കണമെന്നാണ്. കശ്മീരിലെ എല്ലാഭാഗത്തും ഇതേ വികാരാമാണ് കാണാൻ സാധിച്ചത്’- അദ്ദേഹം വ്യക്തമാക്കി
ജമ്മുകശ്മിരിലെ വിവിധ പരിപാടികളിൽ പങ്കെടുത്ത ജയസൂര്യ ജമ്മുവിലെ ബിർല ഇന്റർനാഷണൽ സ്‌കൂളിൽ വിആർ ലാബ് ഉദ്ഘാടനം നിർവഹിച്ചു. സ്‌കൂളിലെ ക്രിക്കറ്റ് അക്കാദമിയും അദ്ദേഹം ഉദ്ഘാടനം ചെയ്തു.
