1991ൽ പുറത്തിറങ്ങി ബോക്സോഫീസിൽ വൻഹിറ്റായ ചിത്രമാണ് ചിന്നത്തമ്പി. ഖുശ്ബു, പ്രഭു കൂട്ടുകെട്ടിൽ പുറത്തിറങ്ങിയ ചിത്രം പി. വാസു ആണ് സംവിധാനം ചെയ്തത്. ചിത്രത്തിലെ ഗാനങ്ങൾ എല്ലാം ഒന്നിനൊന്ന് മികച്ചതും ആയിരുന്നു. ഇപ്പോഴിതാ ചിത്രം 32-ാം വാർഷികത്തിൽ എത്തിയിരിക്കുകയാണ്. ഈ അവസരത്തിലാണ് ഖുശ്ബുവിന്റെ ട്വീറ്റ് ശ്രദ്ധനേടുന്നത്.
പി. വാസുവിനും പ്രഭുവിനും ഒപ്പമുള്ള ചിത്രത്തിനൊപ്പം ആയിരുന്നു ഖുശ്ബുവിന്റെ കുറിപ്പ്. ചിന്നത്തമ്പി റിലീസ് ആയിട്ട് 32 വർഷം ആയെന്ന് വിശ്വസിക്കാൻ കഴിയുന്നില്ല. എന്നിൽ വർഷിച്ച സ്നേഹത്തിന് എന്നും കടപ്പെട്ടിരിക്കുന്നു. പി.വാസു സാറിനും പ്രഭു സാറിനും വേണ്ടി എന്റെ ഹൃദയം എപ്പോഴും തുടിക്കും. ഇളയരാജ സാറിന്റെ ആത്മാവിനെ ഉണർത്തുന്ന സംഗീതത്തിനും നിർമാതാവ് കെ.ബാലുവിനും എക്കാലവും നന്ദിയുണ്ട്. നന്ദിനി എന്ന കഥാപാത്രം ഇന്നും എല്ലാവരുടെയും മനസ്സിൽ പതിഞ്ഞിരിക്കുന്നു. ഒരിക്കൽക്കൂടി നന്ദി പറഞ്ഞുകൊണ്ട് ഖുശ്ബു, എന്നായിരുന്നു താരത്തിന്റെ ട്വീറ്റ്.
തമിഴ്നാട്ടിൽ അക്കാലത്ത് ഇറങ്ങിയ ചിത്രങ്ങളുടെ എല്ലാം റെക്കോർഡ് തകർത്തത് ചിന്നത്തമ്പി ആയിരുന്നു. തമിഴിന് പുറമേ മറ്റു പല ഭാഷകളിലും റീമേക്ക് ചെയ്ത ചിത്രം എല്ലാ ഭാഷകളിലും വൻ വിജയം തന്നെ ആയിരുന്നു. ഇളയരാജയുടെ ഈണത്തിൽ പിറന്ന ഗാനങ്ങൾ 32 വർഷങ്ങൾക്കിപ്പുറവും ആരാധകർ ഹൃദയത്തിൽ സൂക്ഷിക്കുന്നു.
Comments