നർമ്മരസമായ കഥകളിലൂടെ ആരാധകരെ ചിരിപ്പിക്കുന്നതിൽ എന്നും മുന്നിൽ നിൽക്കുന്ന നടനാണ് സിദ്ദിഖ്. സഹപ്രവർത്തകരെകുറിച്ചുള്ള കഥകൾ പറയുന്ന സിദ്ദിഖിന്റെ വീഡിയോ നിമിഷനേരം കൊണ്ടാണ് സമൂഹമാദ്ധ്യമങ്ങൾ ഏറ്റെടുക്കുന്നത്. അത്തരത്തിലെ മറ്റോരു വീഡിയോയാണ് ഇപ്പോൾ വൈറലാകുന്നത്. മകനെയും മരുമകളെയും വിവാഹ ദിവസം ട്രോളുന്നതാണ് വീഡിയോ. മകന് ഷഹീൻ തന്നെയാണ് ഈ വീഡിയോ ഇൻസ്റ്റാഗ്രാമിൽ പങ്കുവെച്ചത്.
വിവാഹ വീഡിയോയിലാണ് മകനെയും മരുമകളെയും സിദ്ദിഖ് ട്രോളുന്നത്. ഫോട്ടോഷൂട്ടിന് ലേറ്റ് ആകും, കണ്ടന്റ് ഉണ്ടാകില്ല എന്നൊക്കെയാണ് മക്കളുടെ ആശങ്കയെന്നും, റിസപ്ഷന് നടക്കുന്നതോ മമ്മൂട്ടി വരുന്നതോ മോഹന്ലാല് വരുന്നതോ ഒന്നുമല്ല, ഫോട്ടോഷൂട്ട് കൃത്യമായി നടക്കണം എന്നതു മാത്രമാണ് മക്കളുടെ ലക്ഷ്യമെന്നും ഷഹീന്റെയും അമൃതയുടെയും വിവാഹസല്ക്കാര വിഡിയോയില് സിദ്ദിഖ് പറയുന്നു. സിദ്ദിഖിന്റെ ഈ കമന്റോടെയാണ് വിവാഹ വീഡിയോ ആരംഭിക്കുന്നത്.
കഴിഞ്ഞ വർഷമായിരുന്നു ഷഹീന്റെയും ഡോക്ടര് അമൃത ദാസിന്റെയും വിവാഹം നടന്നത്. മലയാള സിനിമാ മേഖലയിലെ ഒട്ടുമിക്ക താരങ്ങളും വിവാഹത്തിന് പങ്കെടുത്തിരുന്നു. ഷഹീന് പങ്കുവച്ച വീഡിയോയില് ചടങ്ങിന് പങ്കെടുക്കാനെത്തിയ താരങ്ങളെയും കാണാം. അച്ഛന്റെ വഴി പിന്തുടര്ന്ന് താരത്തിന്റെ മകന് ഷഹീനും മലയാള സിനിമയില് തന്റേതായ സ്ഥാനം ഉറപ്പിച്ചിട്ടുണ്ട്. മമ്മൂട്ടിയെ നായകനാക്കി സലിം അഹമ്മദ് സംവിധാനം ചെയ്ത പത്തേമാരിയിലൂടെയാണ് ഷഹീന് അഭിനയ ജീവിതം ആരംഭിക്കുന്നത്. അച്ഛാ ദിന്, കസബ, ടേക്ക് ഓഫ്, ഒരു കുട്ടനാടന് വ്ളോഗ്, വിജയ് സൂപ്പറും പൗര്ണമിയും തുടങ്ങി നിരവധി ചിത്രങ്ങളില് ഷഹീന് അഭിനയിച്ചിട്ടുണ്ട്.
Comments