ദിസ്പൂർ: അസം ഗുവാഹത്തിയിലെ ആദ്യ എയിംസ് ഉദ്ഘാടനം നിർവഹിച്ച് പ്രധാനമന്ത്രി നരേന്ദ്രമോദി. അസം ബിഹു ഉത്സവം ആഘോഷിക്കുന്നതിന്റെ ഭാഗമായാണ് പ്രധാനമന്ത്രി വിവിധ വികസന പദ്ധതികൾ ഉദ്ഘാടനം ചെയ്തത്. അസം മുഖ്യമന്ത്രി ഹിമന്ത ബിശ്വ ശർമ്മയുടെ സാന്നിധ്യത്തിലായിരുന്നു ഗുവാഹത്തി എയിംസ് ഉദ്ഘാടന ചടങ്ങുകൾ നടന്നത്.
1,123 കോടി രൂപ ചെലവിലാണ് എയിംസിന്റെ നിർമാണ പ്രവർത്തനങ്ങൾ നടപ്പിലാക്കിയത്. 2017-ൽ കെട്ടിടത്തിന്റെ തറക്കല്ലിടൽ ചടങ്ങ് പ്രധാനമന്ത്രി നിർവഹിച്ചിരുന്നത്. നാൽബാരി, നാഗോൺ, കൊക്രജാർ എന്നിവിടങ്ങളിലെ മൂന്ന് മെഡിക്കൽ കോളേജുകളും അസം സന്ദർശനവേളയിൽ പ്രധാനമന്ത്രി ഉദ്ഘാടനം ചെയ്തു.
1.1 കോടി ആയുഷ്മാൻ കാർഡുകൾ വിതരണം ചെയ്യുന്ന പദ്ധതി മുഖ്യമന്ത്രി ഹിമന്ത പ്രഖ്യാപിച്ചു. ആയുഷ്മാൻ കാർഡുകൾ ഉപയോഗിച്ച് പൗരന്മാർക്ക് അഞ്ച് ലക്ഷം രൂപ വരെ ആരോഗ്യ ചികിത്സാ ആനുകൂല്യങ്ങൾ ലഭ്യമാകും. ബിഹു വസന്തോത്സവത്തോടനുബന്ധിച്ച് 14,300 കോടി രൂപയുടെ വികസന പദ്ധതികളാണ് പ്രധാനമന്ത്രി അസമിന് സമർപ്പിച്ചത്.
