കണ്ണൂരിന്റെ പരമ്പരാഗത നാലുമണി പലഹാരമാണ് കണ്ണൂരപ്പം. മുകൾ ഭാഗം വെള്ളയും താഴെ നല്ല ബ്രൗൺ നിറത്തിലുമാണ് ഇത്. ഉണ്ണിയപ്പത്തിൽ നിന്നും വ്യത്യസ്തമായ രുചിയാണ് കണ്ണൂരപ്പത്തിനുള്ളത്. അതുപൊലെ വലിപ്പവും അൽപ്പം കൂടുതലായിരിക്കും. വളരെ സോഫ്റ്റായ ഈ വിഭവം കുട്ടികൾക്കും മുതിർന്നവർക്കും ഒരു പോലെ പ്രിയപ്പെട്ടതാണ്. വടക്കൻ മലബാറിലെ ബേക്കറികളിൽ സുലഭമായ കണ്ണൂരപ്പം വീട്ടിൽ തയ്യാറാക്കുന്നത് എങ്ങനെയെന്ന് നോക്കാം.
ചേരുവകൾ :
പച്ചരി – 1 കപ്പ്
മൈദ – 2 ടേബിൾ സ്പൂൺ
ചോറ് – 1 ടേബിൾ സ്പൂൺ
പഞ്ചസാര -6 ടേബിൾ സ്പൂൺ
ബേക്കിങ് സോഡ – 1/4 ടീസ്പൂൺ താഴെ
ഉപ്പ് – ഒരു നുള്ള്
ഏലക്ക പൊടി – 4 എണ്ണം
എണ്ണ – ആവശ്യത്തിന്
ഒരു കപ്പ് പച്ചരി നാല് തൊട്ടു അഞ്ച് മണിക്കൂർ വരെ വെള്ളത്തിൽ കുതർത്തി വയ്ക്കുക. ശേഷം നന്നായി കഴുകി വെള്ളം കളഞ്ഞു മിക്സിയുടെ ജാറിൽ ഇടുക. അതിലേക്കു ചോറ് ഇട്ട് കുറച്ചു വെള്ളം ഒഴിച്ച് തരി ഉള്ള പോലെ അരച്ചെടുക്കുക. തുടർന്ന് അതിൽ പഞ്ചസാര, മൈദ എന്നിവ കൂടി ചേർത്ത് നല്ലതുപോലെ അരച്ചെടുക്കുക.
അരച്ചെടുത്ത മാവ് ഒരു പാത്രത്തിലേക്ക് മാറ്റി എട്ട് മുതൽ ഒൻപത് മണിക്കൂർ അടച്ചുവെക്കുക. അതിനുശേഷം അതിലേക്കു ബേക്കിങ് സോഡ, ഉപ്പ്, ഏലക്ക ചതച്ചത് എന്നിവ ഇട്ട് നന്നായി ഇളക്കുക.
ഉണ്ണിയപ്പ കാരയിൽ എണ്ണ ചൂടാക്കി മാവ് ഓരോ കുഴിയിലും ഒഴിച്ച് കൊടുക്കുക. മുകൾ ഭാഗം പൊങ്ങി വന്നാൽ അപ്പോൾ തന്നെ മറച്ചിടുക. എന്നിട്ട് താഴത്തെ ഭാഗം ബ്രൗൺ കളർ ആകുന്നതു വരെ വേവിക്കുക. സ്വദിഷ്ടമായ കണ്ണൂരപ്പം തയ്യാറായി. പെട്ടെന്ന കേടാകുമെന്നതിനാൽ ഉണ്ടാക്കിയ ദിവസം തന്നെ കഴിക്കുന്നതാണ് ഉത്തമം.
