രാമാനന്ദ് സാഗർ സംവിധാനം ചെയ്ത ‘രാമായണം’ എന്ന സീരിയൽ 90 കളിൽ വളരെ ജനപ്രിയമായിരുന്നു. ജോലി മാറ്റിവച്ച് പോലും ആളുകൾ ഈ പരമ്പര കാണാറുണ്ടായിരുന്നു. ഈ പരമ്പരയുടെ ജനപ്രീതി ഇന്നും അങ്ങനെതന്നെയാണ്. കൊറോണ കാലത്ത് ഈ സീരിയൽ വീണ്ടും സംപ്രേക്ഷണം ചെയ്തു. മൂന്ന് വർഷം മുമ്പ്, ഈ പരമ്പര ലോക റെക്കോർഡും സൃഷ്ടിച്ചു. ലക്ഷ്മണൻ എന്ന കഥാപാത്രത്തെ അവതരിപ്പിച്ച സുനിൽ ലാഹിരിയാണ് ഇന്ന് സോഷ്യൽ മീഡിയയിൽ പ്രത്യേക കുറിപ്പ് പങ്ക് വച്ചിരിക്കുന്നത് .
മൂന്ന് വർഷം മുമ്പ് ഈ ദിവസമാണ് രാമായണം എന്ന സീരിയലിലെ ലക്ഷ്മണനും മേഘനാദും തമ്മിലുള്ള യുദ്ധത്തിന്റെ എപ്പിസോഡ് സംപ്രേഷണം ചെയ്തത്. സുനിൽ ലാഹിരിയാണ് ഈ സീരിയലിൽ ലക്ഷ്മണനായി വേഷമിട്ടത്. നടൻ വിജയ് അറോറയാണ് മേഘനാദായി വേഷമിട്ടത്. യുദ്ധത്തിന്റെ ഈ എപ്പിസോഡ് വ്യാപകമായി പ്രക്ഷേപണം ചെയ്തു . ഈ എപ്പിസോഡ് ഒരു പുതിയ റെക്കോർഡ് തന്നെ സൃഷ്ടിച്ചു.
എല്ലാ പ്രേക്ഷകർക്കും നന്ദി പറഞ്ഞാണ് സുനിൽ ലാഹിരിയുടെ പോസ്റ്റ് . ‘ ഇന്ന് 2020 ഏപ്രിൽ 16-ന് രാമായണം എന്ന സീരിയലിന്റെ ലക്ഷ്മണൻ-മേഘനാഥ് യുദ്ധ എപ്പിസോഡ് ലോക റെക്കോർഡ് സൃഷ്ടിച്ചു. ടെലിവിഷൻ ലോകത്തെ ഒരു നാഴികക്കല്ലായി അത് മാറി. 7.7 കോടി പ്രേക്ഷകർ ഈ എപ്പിസോഡ് കണ്ടു. എന്റെ ഹൃദയത്തിന്റെ അടിത്തട്ടിൽ നിന്ന് എല്ലാവർക്കും നന്ദി. നിങ്ങളെല്ലാവരും കാരണമാണ് ഇതെല്ലാം സാധ്യമായത്.”- ലക്ഷ്മണനും മേഘനാദും തമ്മിലുള്ള യുദ്ധത്തിന്റെ ഒരു ചിത്രം പോസ്റ്റ് ചെയ്തുകൊണ്ട് സുനിൽ ലാഹിരി കുറിച്ചു.
അദ്ദേഹത്തിന്റെ ഈ ട്വീറ്റ് ഏറെ വൈറലായിരിക്കുകയാണ്. ആരാധകർ ഈ ട്വീറ്റിന് കമന്റ് ചെയ്യുകയും “ഞങ്ങൾ ഈ പരമ്പര വീണ്ടും കാണാൻ സന്തോഷത്തോടെ തയ്യാറാണ്” എന്ന് പറയുകയും ചെയ്യുന്നുണ്ട് .
