പ്രധാനമന്ത്രി നരേന്ദ്രമോദിയെ അഭിമുഖത്തിന് ക്ഷണിച്ചിരിക്കുകയാണ് രാജ്യത്തെ ആദ്യ ആർട്ടിഫിഷ്യൽ ഇന്റലിജൻസ് വാർത്താവതാരക സന. ഇന്ത്യയിലെ ഒരു പ്രമുഖ ദേശീയ മാദ്ധ്യമമാണ് രാജ്യത്തെ ആദ്യ എഐ ആങ്കറെ അവതരിപ്പിച്ചിരിക്കുന്നത്. സമർത്ഥയായ, സുന്ദരിയായ, പ്രായം കുറഞ്ഞ, ഒരിക്കലും മടുപ്പോ തളർച്ചയോ വരാത്ത എഐ വാർത്താവതാരകയാണ് സന. പ്രധാനമന്ത്രി നരേന്ദ്രമോദി പങ്കെടുത്ത പ്രമുഖ ദേശീയ മാദ്ധ്യമത്തിന്റെ കോൺക്ലേവിൽ സന അവതരണം നടത്തിയിരുന്നു.
സന പ്രധാനമന്ത്രിയോട് സംസാരിക്കുന്ന വീഡിയോയും സന കാലാവസ്ഥ റിപ്പോർട്ട് അവതരിപ്പിക്കുന്നതിന്റെ വീഡിയോയും ദേശീയ മാദ്ധ്യമം പുറത്തുവിട്ടിട്ടുണ്ട്. തിരുവനന്തപുരം എന്ന സ്ഥലപ്പേരടക്കം ഉച്ചരിക്കുന്നതും ഇതിൽ കേൾക്കാവുന്നതാണ്. 2024-ൽ ഒരു അഭിമുഖം തരുമോ എന്ന് പരിപാടിയിൽ സന പ്രധാനമന്ത്രിയോട് ചോദിച്ചു. അടുത്ത വർഷം ഇന്ത്യയിൽ ലോക്സഭ ഇലക്ഷൻ നടക്കാനിരിക്കുകയാണല്ലോ. എഐ പ്രോത്സാഹിപ്പിക്കുന്ന വ്യക്തിയായാണ് പ്രധാനമന്ത്രി അറിയപ്പെടുന്നതെന്നും സന വീഡിയോയിൽ പറയുന്നു.
സ്ഫുടമായ ഇംഗ്ലീഷിലാണ് സന പ്രതികരിച്ചത്. എഐ വാർത്താ അവതാരകർ ഇനിയും വ്യാപകമാകാനാണ് സാധ്യത. നാച്വറൽ ലാംഗ്വേജ് പ്രോസസിങ്, ഡീപ് ലേണിങ് എന്നിവ സംയോജിപ്പിച്ച് യഥാർഥമെന്നു തോന്നിപ്പിക്കുന്ന സംഭാഷണ രീതിയും മുഖഭാവങ്ങളും എഐ വാർത്ത വായനക്കാരിൽ കൊണ്ടുവരാൻ ശ്രമിച്ചിരിക്കുന്നു. ഇവയ്ക്ക് ഏത് ടെക്സ്റ്റും വായിക്കാൻ സാധിക്കും. കേൾവിക്കാരുടെ ശ്രദ്ധ പിടിച്ചു നിർത്താൻ കെൽപ്പുള്ള രീതിയിൽ ശബ്ദം ക്രമീകരിക്കാനും സാധിക്കുമെന്നാണ് പറയുന്നത്.
ശബ്ദത്തോട് ചേർന്നുപോകുന്ന രീതിയിൽ കണ്ണിന്റെയും മുഖത്തിന്റെയും ഭാവങ്ങൾ കൊണ്ടുവരാനും സാധിക്കുമെന്ന് റിപ്പോർട്ടുകൾ പറയുന്നു. വിവിധ ഭാഷകൾ, ഉച്ചരാണ രീതികൾ, ശൈലികൾ ഒക്കെ എഐക്കു വഴങ്ങും. ഇപ്പോൾ കാണാൻ സാധിക്കുന്ന അസ്വഭാവികതകൾ കാലക്രമത്തിൽ പരിഹരിച്ചെടുക്കാമെന്നതും ഗുണമാണെന്ന് ഇവ കളംപിടിക്കുമെന്നു കരുതുന്നവർ പറയുന്നു. എന്നാൽ മാദ്ധ്യമപ്രവർത്തനത്തിന്റെ കഴുത്തിന് മുകളിൽ തൂങ്ങുന്ന ഇരുതല മൂർച്ചയുള്ള വാളാണ് എഐ വാർത്താവതാരകർ എന്ന് ചില കൂട്ടർ നിരീക്ഷിക്കുന്നു. എഐ വാർത്താവതാരകരെ പ്രയോജനപ്പെടുത്തി പല മാദ്ധ്യമ സ്ഥാപനങ്ങൾക്കും പണം ലാഭിക്കാൻ സാധിച്ചേക്കും. അതേസമയം, ഇത് ധാർമ്മികമായും, ഉത്തരവാദിത്വത്തോടെയുമാണ് ഉപയോഗിക്കപ്പെടുന്നത് എന്ന് ഉറപ്പാക്കേണ്ടതുണ്ട് എന്നും ഇവർ ചർച്ചയാക്കുന്നു.
ഇന്നത്തെക്കാലത്ത് സാങ്കേതിക വിദ്യയിലെ ഏറ്റവും ചൂടേറിയ വാക്കുകളിൽ ഒന്നാണ് ആർട്ടിഫിഷ്യൽ ഇന്റലിജൻസ്. ഒരു കമ്പ്യൂട്ടറിനെയോ കമ്പ്യൂട്ടർ നിയന്ത്രിത റോബോട്ടിനെയോ ഒരു സോഫ്റ്റ്വെയറിനെയോ മനുഷ്യ മനസ്സിനെപ്പോലെ ബുദ്ധിപരമായി ചിന്തിക്കുന്ന ഒരു രീതിയാണ് ആർട്ടിഫിഷ്യൽ ഇന്റലിജൻസ്. മനുഷ്യ മസ്തിഷ്കത്തിന്റെ പാറ്റേണുകൾ പഠിച്ചും വൈജ്ഞാനിക പ്രക്രിയ വിശകലനം ചെയ്തുമാണ് അക പൂർത്തിയാക്കുന്നത്. ഈ പഠനങ്ങളുടെ ഫലം ഇന്റലിജന്റ് സോഫ്റ്റ്വെയറുകളും സിസ്റ്റങ്ങളും വികസിപ്പിക്കുന്നു.
