കൊച്ചി : ജാതി പരാമര്‍ശത്തില്‍ കുടുങ്ങി മുകേഷും നവ്യ നായരും. സ്വകാര്യ ചാനൽ നടത്തിയ റിയാലിറ്റി ഷോയ്‌ക്കിടെ മത്സരാര്‍ത്ഥിയുമായുള്ള സംഭാഷണമാണ് സോഷ്യല്‍ മീഡിയയില്‍ ചര്‍ച്ചയാകുന്നത്. ഓജസ് ഈഴവന്‍ എന്ന മത്സരാര്‍ത്ഥിയുടെ പേരിനെ ചൊല്ലിയുള്ള പരാമർശമാണ് വിമർശനത്തിനിടയാക്കുന്നത് .
”എന്റെ പേര് ഓജസ് ഈഴവന്‍, എന്‍എസ്എസ് കോളേജ് ഒറ്റപ്പാലം, തേര്‍ഡ് ഇയര്‍ വിദ്യാര്‍ത്ഥിയാണ്” എന്നായിരുന്നു മത്സരാര്‍ത്ഥി പരിചയപ്പെടുത്തിയത്. ”ഓജസ് ഈഴവന്‍, അങ്ങനെ പേരിടുമോ” എന്നായിരുന്നു മുകേഷിന്റെ ചോദ്യം.
”പാര്‍വതി നായര്‍, പാര്‍വതി നമ്പൂതിരി എന്നൊക്കെ ഇടാമെങ്കില്‍ ഓജസ് ഈഴവന്‍ എന്നുമിടാം” എന്നാണ് ഓജസ് മറുപടി നല്‍കിയത്. ”അങ്ങനെ ഇടാം എന്നാലും നമ്മള്‍ അങ്ങനെ കേട്ടിട്ടില്ല, അതുകൊണ്ട് ചോദിച്ചതാണ്” എന്ന് പറഞ്ഞ് മുകേഷ് അമളി രക്ഷപെടാൻ ശ്രമിക്കുകയും ചെയ്യുന്നുണ്ട് . സ്വന്തമായിട്ട് ഇട്ടതാണല്ലേ എന്ന് പറഞ്ഞ് നവ്യ നായരും ഓജസിനെ കളിയാക്കാൻ ശ്രമിക്കുന്നുണ്ട്. വീഡിയോ സോഷ്യല്‍ മീഡിയയില്‍ ചര്‍ച്ചയാവുകയാണ്. ഓജസിനെ അഭിനന്ദിച്ചും മുകേഷിനെയും നവ്യയെയും വിമര്‍ശിച്ചും നിരവധി പേരാണ് എത്തുന്നത്.
