കൊച്ചി: സാധാരണക്കാരായ ജനങ്ങള്‍ക്ക് 20 രൂപ നിരക്കില്‍ വയറുനിറയെ ആഹാരം നല്‍കുകയും ആയിരക്കണക്കിന് കുടുംബശ്രീ അമ്മമാര്‍ക്ക് മാന്യമായ ഉപജീവനമാര്‍ഗ്ഗം ഉറപ്പാക്കുകയും ചെയ്ത ‘ജനകീയ ഹോട്ടല്‍’ പദ്ധതിയെ സര്‍ക്കാര്‍ പൂര്‍ണ്ണമായും തകര്‍ത്തെറിഞ്ഞിരിക്കുകയാണെന്ന് ട്വന്റി 20 പാര്‍ട്ടി സംസ്ഥാന ഉപാധ്യക്ഷന്‍ വി ഗോപകുമാര്‍. വാഗ്ദാനങ്ങള്‍ പെരുപ്പിച്ച് കാണിച്ച് സ്ത്രീശാക്തീകരണത്തിന്റെ പേരില്‍ കൊട്ടിഘോഷിച്ച പദ്ധതി, സര്‍ക്കാരിന്റെ കെടുകാര്യസ്ഥതയും നിരുത്തരവാദപരമായ സമീപനം മൂലം ഇന്ന് പൂട്ടലിന്റെ വക്കിലാണ്. സംസ്ഥാനത്ത് പ്രവര്‍ത്തിച്ചിരുന്ന 1,198 ജനകീയ ഹോട്ടലുകളില്‍ 543 എണ്ണവും ഇതിനകം പൂട്ടി.
ബാക്കിയുള്ളവ ഏത് നിമിഷവും പൂട്ടാവുന്ന ഗുരുതരമായ പ്രതിസന്ധിയിലാണ്. 10.90 രൂപ എന്ന നിരക്കില്‍ ജനകീയ ഹോട്ടലുകള്‍ക്ക് നല്‍കിയിരുന്ന അരിയും പിന്‍വലിച്ചു. ഹോട്ടല്‍ ഒന്നിന് 600 കിലോഗ്രാം അരി വീതം പ്രതിമാസം നല്‍കിയിരുന്നതാണ്. സര്‍ക്കാര്‍ പ്രഖ്യാപിച്ച സബ്‌സിഡി തുക മാസങ്ങളായി നല്‍കാത്തതാണ് ഈ സംരംഭകരെ വന്‍ കടക്കെണിയിലേക്ക് തള്ളിവിട്ടത്. മാവേലി സ്റ്റോറുകള്‍ വഴി കുറഞ്ഞ നിരക്കില്‍ നല്‍കിയിരുന്ന അരി വിതരണം സര്‍ക്കാര്‍ നിര്‍ത്തിവെച്ചു. രൂക്ഷമായ വിലക്കയറ്റത്തില്‍ പിടിച്ചുനില്‍ക്കാനാവാതെ ഊണിന് 35 രൂപയാക്കാന്‍ അവര്‍ നിര്‍ബന്ധിതരായി. എന്നിട്ടും സര്‍ക്കാര്‍ കുടിശ്ശിക നല്‍കാത്തതിനാല്‍ കെ.എസ്.ഇ.ബി ഫ്യൂസ് ഊരിയും പാചകവാതക വിതരണം നിലച്ചും വനിതാ സംരംഭകര്‍ തെരുവിലേക്ക് എറിയപ്പെടുന്ന അവസ്ഥയാണ് കേരളത്തിലുള്ളത്.
Don’t miss the latest breaking news and updates! Subscribe to Janam TV’s WhatsApp channel now…
https://whatsapp.com/channel/0029Va4LMqWE50UdrVhraq0y
ധൂര്‍ത്തിനും സ്വന്തക്കാര്‍ക്ക് പദവികള്‍ വീതംവെക്കാനും പൊതുഖജനാവ് നിര്‍ലോഭം തുറന്നുകൊടുക്കുന്ന ഭരണാധികാരികള്‍ക്ക്, പാവപ്പെട്ടവന്റെ വിശപ്പടക്കുന്ന അമ്മമാര്‍ക്ക് നല്‍കാനുള്ള സബ്‌സിഡി നല്‍കാന്‍ പണമില്ലെന്ന് പറയുന്നത് ലജ്ജാകരമാണ്. വികസനവും ജനക്ഷേമവും എന്നാല്‍ തെറ്റായ പരസ്യപ്രചാരണങ്ങളല്ല, മറിച്ച് ജനങ്ങള്‍ക്ക് താങ്ങാകുന്ന പദ്ധതികള്‍ കൃത്യതയോടെയും അഴിമതിയില്ലാതെയും മുന്നോട്ട് കൊണ്ടുപോകലാണ്. പാവപ്പെട്ടവരുടെ അന്നം മുട്ടിക്കുന്ന ഈ ജനവിരുദ്ധ നിലപാടില്‍ നിന്നും സര്‍ക്കാര്‍ പിന്‍മാറണം. ജനകീയ ഹോട്ടലുകള്‍ക്ക് സര്‍ക്കാര്‍ നല്‍കാനുള്ള മുഴുവന്‍ സബ്‌സിഡി കുടിശ്ശികയും അടിയന്തരമായി കൊടുത്തുതീര്‍ക്കുക, മാവേലി സ്റ്റോറുകള്‍ വഴിയുള്ള സബ്‌സിഡി നിരക്കിലുള്ള ഭക്ഷ്യധാന്യ വിതരണം പുനഃസ്ഥാപിക്കുക, പൂട്ടിക്കിടക്കുന്ന മുഴുവന്‍ ഹോട്ടലുകളും ഉടന്‍ തുറന്നുപ്രവര്‍ത്തിക്കാനുള്ള പ്രത്യേക സാമ്പത്തിക പാക്കേജ് ഉടന്‍ പ്രഖ്യാപിക്കണമെന്നും വി ഗോപകുമാര്‍ ആവശ്യപ്പെട്ടു.
