കൊൽക്കത്ത: ഇന്ത്യ-ബംഗ്ലോദേശ് അതിർത്തിയിലെ പുരാതനമായ ദപത് കാളി ക്ഷേത്രത്തിലെ ഉത്സവത്തിന് സമാരംഭം. പുരാതന നഗരമായ ഹിലിയിലാണ് ക്ഷേത്രം സ്ഥിതി ചെയ്യുന്നത്. ത്രിമഹിനി മേഖലയിലെ തന്നെ പ്രധാന ആഘോഷങ്ങളിലൊന്നാണ് ദപത് കാളി പൂജ.
എല്ലാ വർഷവും ചൈത്ര സംക്രാന്തി ദിനത്തിലാണ് ദപത് കാളി ദേവി ക്ഷേത്രത്തിലെ വാർഷിക ആഘോഷം ആരംഭിക്കുന്നത്. മൂന്ന് ദിവസം നീണ്ടുനിൽക്കുന്ന പൂജകളാണ് ക്ഷേത്രത്തിൽ നടത്തുന്നത്. നൂറ്റാണ്ടുകൾ പഴക്കമുള്ള ക്ഷേത്രത്തിൽ ജാതി-മത ഭേതമന്യേ ലക്ഷകണക്കിന് ആളുകളാണ് എല്ലാവർഷവും ദർശനത്തിനായി എത്തിച്ചേരാറുള്ളത്.
ആചാരപ്രകാരം വാർഷിക പൂജ പുലർച്ചെയാണ് ആരംഭിക്കുന്നത്. ക്ഷേത്രത്തിൽ രാവിലെ മുതൽ സ്ത്രീകളുടെ തിരക്കാണ്. പൂജകൾക്കൊപ്പം പ്രത്യേകമായി തയ്യാറാക്കുന്ന വഴിപാട് പ്രസാദവും ദപത് കാളിയിലെ സവിശേഷതയാണ്. ഉത്സവത്തിന്റെ ഭാഗമായി നിരവധി സ്റ്റാളുകൾ ഉൾപ്പെട്ട പ്രദർശന മേളയും സംഘടിപ്പിച്ചിട്ടുണ്ട്.
