കോട്ടയം: കേരള കോൺഗ്രസിൽ രാജി തുടർക്കഥയാകുന്നു. ജോസഫ് വിഭാഗം വൈസ് ചെയർമാനും മുൻ ഉടമ്പൻ ചോല എംഎൽഎ കൂടിയായിരുന്ന മാത്യു സ്റ്റീഫനാണ് രാജിവെച്ചത്. പാർട്ടി ചെയർമാൻ പി.ജെ ജോസഫിന് മാത്യു സ്റ്റീഫൻ രാജിക്കത്ത് നൽകി.
വ്യക്തിപരമായ കാരണങ്ങളാലാണ് രാജിവെക്കുന്നതെന്ന് സ്റ്റീഫൻ അറിയിച്ചു. ഇന്നലെ കേരള കോൺഗ്രസ് ഡെപ്യൂട്ടി ചെയർമാനായ ജോണി നെല്ലൂർ പാർട്ടി വിട്ടിരുന്നു. യുഡിഫ് സംസ്ഥാന സെക്രട്ടറി സ്ഥാനത്ത് നിന്നും അദ്ദേഹം രാജിവെച്ചിരുന്നു. തുടർന്ന് പുതിയ പാർട്ടി രൂപീകരിക്കുമെന്ന് പ്രഖ്യാപനം നടത്തി. ബിജെപി നയിക്കുന്ന എൻഡിഎയോട് ആഭിമുഖ്യം പ്രകടിപ്പിക്കുന്ന പാർട്ടിയാണ് രൂപീകരിക്കുന്നതെന്നാണ് സൂചന. എന്നാൽ അദ്ദേഹം അത് സ്ഥിരീകരിച്ചിട്ടില്ല. വ്യക്തിപരമായ കാരണങ്ങളാണ് രാജിയ്ക്ക് കാരണമെന്നും ദേശീയ മതനിരപേക്ഷ പാർട്ടി രൂപീകരിക്കുമെന്നും ജോണി നെല്ലൂർ അറിയിച്ചു.
