തിരുവനന്തപുരം: സംസ്ഥാനത്തെ റേഷൻകടകൾ ഇന്ന് പ്രവർത്തനം ആരംഭിക്കും. ഇ-പോസ് മുഖേനയുള്ള റേഷൻ വിതരണം നാളെ മുതൽ പുന:സ്ഥാപിക്കാൻ കഴിയുമെന്ന് ഭക്ഷ്യവകുപ്പ് മന്ത്രി ജി ആർ അനിൽ അറിയിച്ചു. ഇന്ന് മുതൽ പ്രവർത്തനം ആരംഭിക്കാമെന്ന് നാഷണൽ ഇൻഫോർമാറ്റിക്സ് സെന്ററാണ് സംസ്ഥാനത്തെ അറിയിച്ചത്. രാവിലെ ഏഴ് ജില്ലകളിലും ഉച്ചയ്ക്ക് ശേഷം ഏഴ് ജില്ലകളിലുമായാണ് ഇ-പോസ് മുഖേനയുള്ള റേഷൻ വിവതരണം നടത്തുക.
രാവിലെ എട്ട് മണി മുതൽ ഒരു മണി വരെ മലപ്പുറം, തൃശ്ശൂർ, പാലക്കാട്, കൊല്ലം, ആലപ്പുഴ, പത്തനംതിട്ട, വയനാട് ജില്ലകളിലാണ് റേഷൻ വിതരണം നടത്തും. ഉച്ചയ്ക്ക് രണ്ട് മുതൽ ഏഴുവരെ എറണാകുളം, കോഴിക്കോട്, തിരുവനന്തപുരം, കണ്ണൂർ, കോട്ടയം, കാസർകോട്, ഇടുക്കി ജില്ലകളിലുമായിരിക്കും വിതരണം നടക്കുക. മെയ് 3 വരെ ഈ സമയ ക്രമം തുടരും. ഏപ്രിൽ മാസത്തെ റേഷൻ വിതരണം മെയ് അഞ്ച് വരെ നീട്ടും. മേയ് ആറിന് ശേഷമായിരിക്കും മേയ് മാസത്തെ റേഷൻ വിതരണം നടക്കുക.
