കോഴിക്കോട് : മദ്യലഹരിയിൽ ചുരംറോഡിലെ ഹോട്ടലിലും തൊട്ടിൽപ്പാലം കെഎസ്ആർടിസി ഡിപ്പോ പരിസരത്തും പരാക്രമം കാട്ടിയ എസ്ഐ അറസ്റ്റിൽ. ന്യൂമാഹി പോലീസ് സ്റ്റേഷനിലെ എസ്ഐ അനിൽ കുമാറിനെയാണ് തൊട്ടിൽപ്പാലം പോലീസും നാട്ടുകാരും ചേർന്ന് പിടികൂടിയത്.
വ്യാഴായ്ച രാത്രിയോടെയായിരുന്നു സംഭവങ്ങൾക്ക് തുടക്കം. പക്രംതളം ചുരം പത്താംവളവിന് സമീപത്തെ ഹോട്ടലിലും കെഎസ്ആർടിസി ഡിപ്പോ പരിസരത്തും നാടകീയ സംഭവങ്ങളാണ് അരങ്ങേറിയത്. കുടുംബത്തോടൊപ്പം എത്തിയ എസ്ഐ ഹോട്ടലിൽ കയറി ഭക്ഷണം കഴിച്ചതിന് ശേഷം ഹോട്ടൽ ഉടമയുമായി വാക്ക് തർക്കത്തിൽ ഏർപ്പെട്ടു. പിന്നാലെ ഹെൽത്ത് ഇൻ്സ്പെക്ടറാണെന്ന് പറഞ്ഞ് ഭക്ഷണം കഴിച്ചതിന്റെ പണം നൽകാതെ ഹോട്ടൽ ഉടമയെ അസഭ്യം പറഞ്ഞ് സ്ഥലം വിടുകയായിരുന്നു.
വിവരമറിഞ്ഞ പ്രദേശവാസികളും പോലീസും ചേർന്ന് തൊട്ടിൽപ്പാലം കെഎസ്ആർടിസി ഡിപ്പോയുടെ പരിസരത്ത് വെച്ച് എസ്ഐയും കുടുംബവും സഞ്ചരിച്ചിരുന്ന വാഹനം തടഞ്ഞു നിർത്തി. എന്നാൽ ഇവർക്ക് നേരെയും എസ്ഐ അസഭ്യ വർഷം തുടർന്നു. ബലപ്രയോഗത്തിലൂടെയാണ് പോലീസ് ഇയാളെ സ്റ്റേഷനിൽ എത്തിച്ചത്. പിന്നീട് നടത്തിയ ചോദ്യം ചെയ്യലിലാണ് ന്യൂമാഹി സ്റ്റേഷൻ എസ്ഐ അനിൽകുമാറാണ് പിടിയിലായിരിക്കുന്നതെന്ന് മനസിലായത്. വൈദ്യപരിശോധനയാക്കായി കുറ്റ്യാടി താലൂക്ക് ആശുപത്രിയിൽ എത്തിച്ചപ്പോഴും അനിൽകുമാർ ബഹളം വെയ്ക്കുകയായിരുന്നു.
