ന്യൂഡൽഹി: ഭാരതം വലിയൊരു പരിവർത്തനത്തിന്റെ വക്കിലാണെന്ന് ആപ്പിൾ സിഇഒ ടിം കുക്ക്. ഇന്ത്യയിൽ ധാരാളം അവസരങ്ങൾ കാണുന്നുവെന്നും കേന്ദ്രസർക്കാർ നൽകുന്ന ഉൽപ്പാദന ബന്ധിത സൗജന്യങ്ങൾ (പ്രൊഡക്ട് ലിങ്ക് ഇൻസെൻറീവ്‌സ്) ആപ്പിളിനെ ഏറെ സഹായിക്കുന്നുവെന്നും അദ്ദേഹം പറഞ്ഞു. സമ്പന്നരായ ഇടത്തരം കുടുംബങ്ങളുടെ എണ്ണം കൂടിവരികയാണ്. ഇത് ഐഫോണിനുള്ള വിപണിയെന്ന നിലയിൽ ഇന്ത്യയുടെ പ്രാധാന്യം വർദ്ധിപ്പിക്കുന്നു. അതുകൊണ്ട് തന്നെ ഭാരതം ഒരു അവിശ്വസനീയമായ വിപണിയാണ്. മാത്രമല്ല ആപ്പിൾ ശ്രദ്ധ കേന്ദ്രീകരിക്കുന്ന രാജ്യവുമാണ്.
ഭാരതത്തിൽ ആപ്പിളിന്റെ വളർച്ച ശോഭനീയമാണ്. വർഷം തോറും ഇന്ത്യയിൽ ആപ്പിളിന്റെ വളർച്ച ഇരട്ടയക്കത്തിലാണെന്നും ടിം കുക്ക് വ്യക്തമാക്കി. ആപ്പിളിന്റെ റിട്ടെയ്ൽ ബ്രാൻറ് ഷോപ്പുകൾ ഇന്ത്യയിൽ വർദ്ധിക്കുകയാണ്. കഴിഞ്ഞ മാസം രണ്ട് ആപ്പിൾ റീട്ടെയ്ൽ ഷോപ്പുകൾ ഇന്ത്യയിൽ തുറന്നിരുന്നു. ഒന്ന് മുംബൈയിലും മറ്റൊന്ന് ഡൽഹിയിലും. ഇക്കഴിഞ്ഞ സന്ദർശനത്തിൽ പ്രധാനമന്ത്രി നരേന്ദ്രമോദി, കേന്ദ്ര ഐടി മന്ത്രി അശ്വിനി വൈഷ്ണവ്, ഐടി സഹമന്ത്രി രാജീവ് ചന്ദ്രശേഖർ എന്നിവരുമായി ടിം കുക്ക് കൂടിക്കാഴ്ച നടത്തിയിരുന്നു. സ്മാർട്ട് ഫോൺ നിർമ്മാണത്തിൽ ലോകത്തിലെ രണ്ടാമത്തെ രാജ്യമായ ഇന്ത്യയുടെ കാര്യത്തിൽ ആപ്പിളിനുള്ള പ്രതിബദ്ധത ടിം കുക്ക് ഈ കൂടിക്കാഴ്ചയിൽ അറിയിക്കുകയും ചെയ്തു.
