പൊന്നിയിൻ സെൽവന് ശേഷം ഐശ്വര്യ റായിയും വിക്രമും മണിരത്നവും വീണ്ടും ഒന്നിക്കുന്നുവെന്ന് റിപ്പോർട്ടുകൾ. ചരിത്രത്തിൽ നിന്നും തികച്ചും വ്യത്യസ്തമായി പ്രണയകഥയാണ് മൂവരും ചേർന്ന് ഒരുക്കുന്നത്.
2010 ൽ പുറത്തിറങ്ങിയ രാവണനിലാണ് ഐശ്വര്യയും വിക്രമും ആദ്യമായി ഒന്നിച്ച് അഭിനയിക്കുന്നത്. രാമായണ കഥയെ ആസ്പദമാക്കി ഒരുക്കിയ ചിത്രത്തിൽ വീരയ്യ എന്ന നക്സലൈറ്റിന്റെ കഥാപാത്രത്തെ വിക്രം അവതരിപ്പിച്ചപ്പോൾ രാഗിണി സുബ്രഹ്മണ്യം എന്ന കഥാപാത്രമായി ഐശ്വര്യയെത്തി. ചിത്രത്തിന്റെ ഹിന്ദി പതിപ്പിൽ വിക്രമിന്റെ കഥാപാത്രത്തെ അഭിഷേക് ബച്ചനാണ് അവതരിപ്പിച്ചത്. രാഗിണിയുടെ ഭർത്താവ് ദേവ് പ്രതാപ് കുമാർ എന്ന പോലീസ് കഥാപാത്രമായി വിക്രമെത്തി.
കമൽ ഹാസനെ നായകനായുള്ള ചിത്രത്തിന്റെ പ്രാഥമിക തയ്യാറെടുപ്പിലാണ് മണിരത്നമിപ്പോൾ. ജയമോഹനും മണിരത്നവും ചേർന്നാണ് തിരക്കഥ ഒരുക്കുന്നത്. ഈ ചിത്രം പൂർത്തിയാക്കിയതിന് ശേഷമായിരിക്കും വിക്രം-ഐശ്വര്യ ജോഡി ചിത്രം ആരംഭിക്കുന്നത്.
