മലയാള സിനിമയിലെ ഏറ്റവും വലിയ വിജയങ്ങളിലൊന്നാണ് ഉണ്ണി മുകുന്ദൻ നായകനായ മാളികപ്പുറം. അടുത്തിടെ പുറത്തിറങ്ങിയ മലയാള ചിത്രങ്ങളിൽ ഏറെ ജനപ്രിയത നേതിയ ചിത്രം കൂടിയായിരുന്നു മാളികപ്പുറം. സിനിമയുടെ നൂറാം ദിവസം അണിയറ പ്രവർത്തകർ വലിയ ആഘോഷമാക്കിയിരുന്നു. മലയാള സിനിമയിൽ ആദ്യമായിട്ടായിരിക്കും സിനിമയുടെ വിജയത്തിന് ശേഷം എല്ലാ അണിയറ പ്രവർത്തകർക്കും ലാഭ വിഹിതത്തിൽ നിന്നും ഒരു തുക നിർമ്മാതാക്കൾ കൈമാറുന്നതും. ഇപ്പോഴിതാ, മാളികപ്പുറത്തിന്റെ ഭാഗമായതിൽ സന്തോഷം പങ്കുവെച്ചിരിക്കുകയാണ് നടൻ വിജയകൃഷ്ണൻ.
‘വിജയങ്ങൾ നേടുക അല്ലെങ്കിൽ അതിന്റെ ഭാഗമാവുക എന്നത് ഏറെ മനോഹരമാണ്. ജീവിതത്തിൽ അത്യാവശ്യം തോൽവികളും നഷ്ടങ്ങളും നേരിട്ട ഒരുവനെന്ന നിലയ്ക്ക് ഏറെ ആദരവോടെ സ്നേഹത്തോടെ ഹൃദയപൂർവ്വം ഈ സ്നേഹം ഏറ്റുവാങ്ങുന്നു. ‘മാളികപ്പുറം’ ദൈവീകത ഉള്ളൊരു സിനിമയായി തന്നെകാണുന്നു. അതിന്റെ വളരെ ചെറിയ ഭാഗമായതിന്റെ വലിയ സന്തോഷം ഏറ്റുവാങ്ങിയത് പങ്കുവെയ്ക്കുന്നു’.
‘ഞാൻ ഈ സിനിമയിലേക്ക് വരാൻ കാരണക്കാരായ എഴുത്തുകാരൻ അഭിലാഷ് പിള്ളയ്ക്കും പ്രിയപ്പെട്ട സംവിധായകൻ വിഷ്ണു ശശി ശങ്കറിനും ഏറെ സ്നേഹം. കൂടെ എന്റെ ‘ചായകുടി പോക്ക്’ രസമായി പകർത്തിയ വിഷ്ണു നാരയണൻ ഏട്ടൻ, പ്രിയപ്പെട്ട റോജോ തോമസ് പണിക്കർ, ജിജോ ജോസ് ബേബി, പണിക്കർ, ജിജോ ജോസ്, സഞ്ജയ് പടിയൂർ, അഭിലാഷ് പൈങ്ങോട്, രാഹുൽ തങ്കച്ചൻ തുടങ്ങിയ എല്ലാ മാളികപ്പുറം ടീമിനും സ്നേഹം’ എന്ന് വിജയകൃഷ്ണൻ ഫേയ്സ്ബുക്കിൽ കുറിച്ചു.
