ബംഗളൂരു: കർണാടക മുഖ്യമന്ത്രിയെ തീരുമാനിക്കുന്നതിനുള്ള കാലതാമസത്തിന്റെ കാരണം കോൺഗ്രസിലെ ഐക്യമില്ലായ്മയെന്ന് ബസവരാജ ബൊമ്മൈ. ഈ കാലതാമസം കോൺഗ്രസിന്റെ ഐക്യമില്ലായ്മയാണ് കാണിക്കുന്നതെന്ന് പാർട്ടിയെ പരിഹസിച്ച് ബൊമ്മൈ പറഞ്ഞു. മാദ്ധ്യമപ്രവർത്തകരോട് സാസാരിക്കവെയാണ് അദ്ദേഹം ഇക്കാര്യം വ്യക്തമാക്കിയത്.
‘കർണാടകയിലെ ജനങ്ങൾ കോൺഗ്രസിന് വിശ്വസിച്ച് വോട്ട് നൽകിയതിനാൽ സംസ്ഥാനത്ത് വികസനം കൊണ്ടുവരാനായി കോൺഗ്രസ് പ്രവർത്തിക്കണം. കോൺഗ്രസ് രാഷ്‌ട്രീയം കളിക്കുന്നത് നിർത്തി പുതിയ മുഖ്യമന്ത്രിയെ തിരഞ്ഞെടുക്കണം, സർക്കാർ രൂപീകരിച്ച് ജനങ്ങളെ സേവിക്കണം. ഇത് കോൺഗ്രസ് പാർട്ടിയുടെ ആഭ്യന്തര പ്രശ്നമാണ്. അതിനെ കുറിച്ച് സംസാരിക്കാൻ താൽപര്യമില്ല’ബൊമ്മൈ പറഞ്ഞു.
കർണാടക പ്രദേശ് കോൺഗ്രസ് കമ്മിറ്റി പ്രസിഡന്റ് ഡികെ ശിവകുമാറിന്റെയും മുൻ മുഖ്യമന്ത്രി സിദ്ധരാമയ്യയുടെയും പേരുകൾ പാർട്ടിയിലെ വിവിധ ഗ്രൂപ്പുകൾ ഉയർത്തുന്നുണ്ട്. എന്നാൽ കോൺഗ്രസ് നേതാക്കൾ ഇതുവരെ ഒരു തീരുമാനവും അറിയിച്ചിട്ടില്ല. നിലവിൽ കോൺഗ്രസ് അദ്ധ്യക്ഷൻ മല്ലികാർജുൻ ഖാർഗെയുടെ നേതൃത്വത്തിൽ പാർട്ടിയ്‌ക്കുള്ളിൽ ചർച്ചകൾ നടക്കുകയാണ്.
