പുതിയ ഉത്പന്നം അവതരിപ്പിക്കാനൊരുങ്ങുകയാണ് ആപ്പിൾ. എന്നാൽ ഇത്തവണ അത് ഐഫോണോ, ഐപാഡോ, എയർപോടോ ആയിരിക്കില്ലെന്നാണ് റിപ്പോർട്ടുകൾ പറയുന്നത്. തികച്ചും വ്യത്യസ്തയാർന്ന ഉത്പന്നവുമായാണ് ഇത്തവണ ആപ്പിളെത്തുക, മിക്സഡ് റിയാലിറ്റിയിൽ പ്രവർത്തിക്കുന്ന ഹെഡ്സെറ്റ്. മിക്സഡ് റിയാലിറ്റിയിൽ പ്രവർത്തിക്കുന്ന ഹെഡ്സെറ്റ് വരുന്ന ജൂണിൽ പുറത്തിറക്കുമെന്നാണ് വിവരം.
AR/ VR വിപണിയെ മുഴുവനായും ഉത്തേജിപ്പിക്കാൻ ആപ്പിൾ ഹെഡ്സെറ്റിന് കഴിയുമെന്ന വിലയിരുത്തലിലാണ് ടെക് വിപണി. ഏറെ നാളായി ഹെഡ്സെറ്റ് പണിപ്പുരയിലാണ്. വിപണിയെ കീഴടക്കുന്ന ശക്തമായ ഉത്പന്നമായിരിക്കും ഇതെന്നാണ് വിദഗ്ധർ അഭിപ്രായപ്പെടുന്നത്. ഇത് ഓഗ്മെന്റഡ് റിയാലിറ്റിയിലും (എആർ), വെർച്വൽ റിയാലിറ്റിയിലും (വിആർ) എന്നിവയിൽ ശ്രദ്ധ കേന്ദ്രീകരിക്കുന്നവയാകും. ഇതോടെ ഈ മേഖലയിലേക്കുള്ള ആപ്പിളിന്റെ കടന്നുകയറ്റമാകും വരാൻ പോകുന്നത്.
ആപ്പിൾ റിയാലിറ്റി പ്രോ എന്ന പേരിട്ടിരിക്കുന്ന ഹെഡ്സെറ്റ് XR ഹെഡ്സെറ്റുകളിൽ മികച്ച ഒന്നായിരിക്കുമെന്നാണ് വിലയിരുത്തപ്പെടുന്നത്. സോണിയിൽ നിന്നുള്ള മൈക്രോ ഒഎൽഇഡി ഡിസ്പ്ലേകൾ, ടിഎസ്എംസി നിർമ്മിച്ച ഡ്യുവൽ പ്രൊസസറുകൾ, 12 ക്യാമറകൾ, എക്റ്റേർണൽ പവർ സപ്ലൈ എന്നിവ ഇതിന് ഉണ്ടാകും. 3,000 ഡോളറാകും (2,46,594 രൂപ) ഇതിന്റെ വിപണി വില. പ്രൊഫഷണലുകളെ ലക്ഷ്യം വച്ചുള്ളതായിരിക്കും ഹെഡ്സെറ്റ്. ഈ വർഷം അവസാനത്തോടെ ഹെഡ്സെറ്റ് വിൽപ്പനയ്ക്കെത്തുമെന്ന് പ്രതീക്ഷിക്കുന്നു. ജൂൺ 5 മുതൽ ജൂൺ 9 വരെ നടക്കുന്ന വാർഷിക വേൾഡ് വൈഡ് ഡെവലപ്പേഴ്സ് കോൺഫറൻസിലാകും (ഡബ്ല്യൂഡബ്ല്യൂഡിസി) ആപ്പിൾ ഹെഡ്സെറ്റ് അവതരിപ്പിക്കുകയെന്നാണ് വിവരം.
