തിരുവനന്തപുരം: വിഴിഞ്ഞം തുറമുഖ നിർമ്മാണ പ്രവർത്തനങ്ങൾക്ക് വെല്ലുവിളിയായി പ്രതികൂല കാലാവസ്ഥ. തുറമുഖത്തിന്റെ നിർമ്മാണ പ്രവർത്തനങ്ങൾ പുരോഗമിക്കുന്ന സാഹചര്യത്തിലാണ് കാലാവസ്ഥയിലെ മാറ്റങ്ങൾ പ്രതിസന്ധിയാകുന്നത്. മൺസൂൺ ആയതോടെ ഉയർന്ന തിരമാല കാരണം കടലിലെ ഡ്രജജിംഗ് ഉൾപ്പെടെയുള്ള ജോലികൾ കരാർ കമ്പനി നിർത്തിവെച്ചു. രണ്ട് മാസത്തേയ്ക്കാണ് നിർമ്മാണ പ്രവർത്തനങ്ങൾ നിർത്തി വെച്ചിരിക്കുന്നത്.
നിലവിൽ ഒരു മദർഷിപ്പിന് മാത്രമാണ് കപ്പൽ അടുപ്പിക്കാനുള്ള സൗകര്യം ഒരുക്കിയിട്ടുള്ളത്. കഴിഞ്ഞ 15-നാണ് ഡ്രജ്ജിഗ് ഉൾപ്പെടെയുള്ള ജോലികൾ താൽക്കാലികമായി കരാർ കമ്പനി നിർത്തിവെച്ചത്. മൺസൂൺ കാലമായതോടെ ഉയർന്ന തിരമാല നിർമ്മാണ പ്രവർത്തങ്ങളെ കാര്യമായി ബാധിക്കുന്നുണ്ട്. ആഴം കൂടിയ പ്രദേശമായതിനാൽ സാധാരണ നിലയിൽ നിന്നും ഉയർന്ന തിരമാല പ്രതിസന്ധിയ്ക്ക് കാരണമാകുന്നു.
സെപ്തംബറിൽ തുറമഖത്തേയ്ക്ക് ആദ്യ കപ്പൽ വരും എന്നാണ് സർക്കാർ പ്രഖ്യാപനം. അതുകൊണ്ടു തന്നെ നിലവിൽ ഒരു കപ്പൽ ചാലിന്റെ പ്രവർത്തനങ്ങൾ മാത്രമാണ് പൂർത്തിയാക്കാൻ ശ്രമിക്കുന്നത്. പ്രതികൂല കാലാവസ്ഥ ഈ പ്രവർത്തനങ്ങളെ കൂടി ബാധിച്ചേയ്ക്കുമെന്ന ആശങ്കയും നിലനിൽക്കുന്നു. അതേസമയം നിർമ്മാണം പൂർത്തിയാക്കുന്നതിനായി ക്രെയിൻ ഉൾപ്പെടെയുള്ള ഉപകരണങ്ങൾ കൂടി എത്തിക്കേണ്ടതുണ്ട്. ഈ ഉപകരണങ്ങൾ ഓഗസ്റ്റിൽ ചൈനയിൽ നിന്നും എത്തുമെന്നാണ് നിലവിൽ ലഭിക്കുന്ന വിവരം.
പാറകൾ അടുക്കി പുലിമുട്ടുകൾ നിർമ്മിക്കുന്ന പ്രവർത്തനങ്ങളും താൽക്കാലികമായി നിർത്തിവയ്ക്കേണ്ടി വരും. പുലിമുട്ട് നിർമ്മാണത്തിനുള്ള സർക്കാർ വിഹിതമായ 75 കോടി രൂപ കഴിഞ്ഞ ദിവസങ്ങളിൽ കരാർ കമ്പനിയ്ക്ക് കൈമാറിയിരുന്നു. സർക്കാർ 347 കോടി രൂപയിൽ ഇനി 22 കോടി രൂപയാണ് കരാർ കമ്പനിയ്ക്ക് നൽകേണ്ടത്.
