സിഡ്‌നി: ഓസ്‌ട്രേലിയയിലെത്തിയ പ്രധാനമന്ത്രി നരേന്ദ്രമോദിക്ക് ഊഷ്മളമായ സ്വീകരണം നൽകി ഇന്ത്യൻ സമൂഹം. സിഡ്‌നിയിലെ ഖുദോസ് ബാങ്ക് അരീനയിലായിരുന്നു നരേന്ദ്രമോദിക്ക് ഇന്ത്യൻ സമൂഹം സവിശേഷമായ സ്വീകരണം നൽകിയത്. ഭാരത് മാതാ കീ ജയ്, വന്ദേഭാരതം, മോദി-മോദി വിളികൾ സിഡ്‌നി സ്‌റ്റേഡിയത്തിൽ അലയടിച്ചു. ചടങ്ങിലെത്തിയ ഓസ്‌ട്രേലിയൻ പ്രധാനമന്ത്രി ആന്റണി ആൽബനീസ് ‘ദി ബോസ്’ എന്നാണ് മോദിയെ വിശേഷിപ്പിച്ചത്.
ലോകപ്രശസ്തനായ റോക്ക്‌സ്റ്റാർ ബ്രൂസ് സ്പ്രിങ്സ്റ്റീൻ ഓസ്ട്രേലിയയിൽ എത്തിയപ്പോൾ ലഭിച്ചതിനേക്കാൾ സ്വീകരണമാണ് ഇന്ത്യൻ പ്രധാനമന്ത്രിക്ക് കിട്ടുന്നതെന്നും പിഎം മോദി ഈസ് ദി ബോസ് എന്നും ആന്റണി ആൽബനീസ് പറഞ്ഞു. മോദിയെ കാണാൻ എത്തിയ ജനക്കൂട്ടത്തെ കണ്ട് വിസ്മയിച്ചായിരുന്നു ഓസ്‌ട്രേലിയൻ പ്രധാനമന്ത്രിയുടെ പരാമർശം. റോക്ക്‌സ്റ്റാർ ബ്രൂസ് സ്പ്രിങ്സ്റ്റീൻ അദ്ദേഹത്തിന്റെ ആരാധകർക്കിടയിൽ ദി ബോസ് എന്നാണ് അറിയപ്പെടുന്നത് എന്നതിനാലായിരുന്നു ആൽബനീസ് ഇപ്രകാരം മോദിയെ വിശേഷിപ്പിച്ചത്. അമേരിക്കൻ ഗായകനും സംഗീത രചയിതാവുമായ ബ്രൂസ് സ്പ്രിങ്സ്റ്റീനേക്കാൾ ജനപ്രിയനാണ് മോദിയെന്നും ആൽബനീസ് അഭിപ്രായപ്പെട്ടു.
ഏതാനും മാസങ്ങൾക്ക് മുമ്പ് ഇന്ത്യയിലെത്തിയപ്പോൾ തനിക്കുണ്ടായ അനുഭവവും ആന്റണി ആൽബനീസ് പങ്കുവച്ചു. കഴിഞ്ഞ മാർച്ചിൽ ഇന്ത്യയിലേക്ക് പോയ യാത്ര തികച്ചും മറക്കാനാകാത്ത നിമിഷങ്ങളായിരുന്നു സമ്മാനിച്ചത്. ഗുജറാത്തിൽ ഹോളി ആഘോഷിക്കാൻ കഴിഞ്ഞു. ഡൽഹിയിൽ മഹാത്മജിയുടെ സ്മാരകത്തിൽ പുഷ്പചക്രം സമർപ്പിച്ചു. ഭാരതീയരും ഓസ്‌ട്രേലിയൻ സമൂഹവും തമ്മിലുള്ള ആഴത്തിലുള്ള ബന്ധം ഇന്ത്യയിലെവിടെ എത്തിയപ്പോഴും തനിക്ക് അനുഭവപ്പെട്ടു. ഇന്ത്യയെ മനസിലാക്കണമെങ്കിൽ രാജ്യത്തെ ട്രെയിനിലും ബസിലുമാണ് യാത്ര ചെയ്യേണ്ടതെന്നും ഓസ്‌ട്രേലിയൻ പ്രധാനമന്ത്രി പറഞ്ഞു.
ഒമ്പത് വർത്തിന് ശേഷം ആദ്യമായാണ് നരേന്ദ്രമോദി ഓസ്‌ട്രേലിയയിലെത്തുന്നത്. അവസാനമായി 2014-ലായിരുന്നു അദ്ദേഹം സന്ദർശനം നടത്തിയത്.
