കൊല്ലം: വീട്ടിൽ പ്രസവിച്ച യുവതിയ്ക്കും കുഞ്ഞിനും കൈത്താങ്ങായി 108 ആംബുലൻസ് ജീവനക്കാർ. ഇന്നലെ രാത്രിയാണ് സംഭവം. കൊല്ലം കല്ലുവാതുക്കൽ സ്വദേശിനിയായ 26 കാരിയാണ് വീട്ടിൽ പെൺകുഞ്ഞിന് ജന്മം നൽകിയത്. വ്യാഴാഴ്ച്ച രാത്രി എട്ടരയോടെയാണ് സംഭവം. ആംബുലൻസ് ഡ്രൈവർ നബീൽ, എമർജൻസി മെഡിക്കൽ ടെക്നീഷ്യൻ ലിജോമോൾ എന്നിവരാണ് കൃത്യസമയത്ത് യുവതിയ്ക്കും കുഞ്ഞിനും രക്ഷകരായത്.
യുവതിക്ക് പ്രസവവേദന അനുഭവപ്പെടുകയും ആശുപത്രിയിലേക്ക് മാറ്റാൻ ശ്രമിക്കവെ കുഞ്ഞിന് ജന്മം നൽകുകയുമായിരുന്നു. ഉടൻ തന്നെ ബന്ധുക്കൾ കനിവ് 108 ആംബുലൻസിന്റെ സഹായം തേടി. പിന്നാലെ ആംബുലൻസ് ജീവനക്കാർ സ്ഥലത്തെത്തി. ഉടൻ എമർജൻസി മെഡിക്കൽ ടെക്നീഷ്യൻ ലിജോമോൾ കുഞ്ഞിന്റെ പൊക്കിൾകൊടി വേർപ്പെടുത്തി ഇരുവർക്കും വേണ്ട പ്രഥമശുശ്രൂഷ നൽകുകയും ആംബുലൻസിലേക്ക് മാറ്റുകയും ചെയ്തു. തുടർന്ന് നബീൽ ഉടൻ അമ്മയെയും കുഞ്ഞിനെയും പാരിപ്പള്ളി മെഡിക്കൽ കോളേജ് ആശുപത്രിയിൽ എത്തിച്ചു. ഇരുവരും സുഖമായി ഇരിക്കുന്നതായി ആശുപത്രി അധികൃതർ അറിയിച്ചു.
